தாராபுரத்திலுள்ள உப்பாறு அணைக்கு, பி.ஏ.பி., தொகுப்பில், அரசூர் ஷட்டர் வழியாக தண்ணீர் வினியோகிக்கப்படுகிறது. உப்பாறு அணையை சார்ந்து, 6,100 ஏக்கர் பாசன பரப்பு உள்ளது. மாவட்டம் முழுவதும் வடகிழக்கு பருவமழை சிறப்பாக பெய்துள்ளது. ஆனாலும், உப்பாறு அணை பகுதிகளில் போதிய மழைப்பொழிவு இல்லை.

பி.ஏ.பி., தொகுப்பிலிருந்து உப்பாறு அணைக்கு இம்மாதம் உயிர் நீர் திறக்கவேண்டும் என, மாவட்ட நிர்வாகத்திடம் விவசாயிகள் தொடர்ந்து கோரிக்கை விடுத்துவருகின்றனர். ஆனாலும், பி.ஏ.பி., வாய்க்காலில், உப்பாறு அணைக்கு தண்ணீர் திறக்காதது விவசாயிகளுக்கு ஏமாற்றத்தை அளித்துள்ளது.

5 அடி நீர்தான் பயன்படுத்த முடியும்

தமிழக கட்சி சார்பற்ற விவசாயிகள் சங்க தலைவர் காளிமுத்து கூறியதாவது:

உப்பாறு அணையில் மொத்தம், 24 அடியில், 12 அடிக்கு மட்டுமே தண்ணீர் உள்ளது. அதிலும், 7 அடிக்கு தண்ணீர் திறக்கமுடியாது. அதாவது, 5 அடி நீரைத்தான் பயன்படுத்த முடியும். பாசனத்துக்கு அதிகபட்சம் நான்கு நாட்கள் மட்டுமே தண்ணீர் திறக்கமுடியும். கான்டூர் கால்வாய் அல்லாமல் பஞ்சலிங்க அருவியிலிருந்தும் கூடுதல் நீர் திருமூர்த்தி அணைக்கு வந்துகொண்டிருந்தது. அதனால், பி.ஏ.பி., தொகுப்பிலிருந்து இம்மாதம் தொடர்ந்து ஐந்து நாட்களுக்கு உயிர் நீர் வழங்கவேண்டும் என, மாவட்ட நிர்வாகத்திடம் கோரிக்கை விடுத்து வருகிறோம்.

ஆழ்துளைக்கிணறு நீர்மட்டம் சரிவு

உப்பாறு அணைக்கு தண்ணீர் திறக்க நடவடிக்கை எடுப்பதாக கலெக்டர் உறுதி அளித்தார்; ஆனால், இன்னும் தண்ணீர் திறக்கப்படவில்லை. திருமூர்த்தியில் 52 அடிக்கு தண்ணீர் உள்ளது; நீர்மட்டம் 53 அடியை எட்டும்போது, உப்பாறு அணைக்கு தண்ணீர் திறக்கப்படும் என்கின்றனர். பஞ்சலிங்க அருவியில் தண்ணீர் வரத்து தற்போது குறைந்துவிட்டது. இதனால் உப்பாறு அணைக்கு உயிர்நீர் கிடைக்குமா என்கிற சந்தேகம் எழுந்துள்ளது.

பி.ஏ.பி., பாசன பகுதிகளில் போதுமான அளவு மழை பெய்துள்ளது. ஆனாலும், பி.ஏ.பி., மூன்றாவது மண்டலத்தில் ஐந்தாவது சுற்று தண்ணீர் திறக்கப்பட்டுள்ளது. உப்பாறு பாசன விவசாயிகள், தென்னை மற்றும் தட்டைப்பயிறு, பாசிப்பயிறு, கொள்ளு உள்ளிட்ட மானாவாரி பயிர்களை பயிரிட்டுள்ளனர். கால்நடைத் தீவனத்துக்காக, சோளத்தட்டு பயிரிடப்பட்டுள்ளது. விவசாய நிலங்களில் உள்ள ஆழ்துளை கிணறுகளின் நீர்மட்டம் சரிந்துள்ளது.

இவ்வாறு, அவர் கூறினார்.

---

உப்பாறு அணை