மண் திட்டுகள் மூழ்கினால் பறவை வாழ்விடம் பாதிக்கும் பறவைகள் வசிக்கும் மற்றும் வலசை வரும் நஞ்சராயன் குளத்தில், நீர் முழுக்க நிரம்பி ததும்புவது, நீரில் நீந்திச் சென்று இரை தேடும் நீர் காகம், கூழைக்கிடா உள்ளிட்ட ஒரு சில பறவைகளுக்கு மட்டும் தான் பலன் தரும். மாறாக, நீரில் நடந்துச் சென்று இரை தேடும் வண்ண நாரை, கரண்டி வாயன், அருவா மூக்கன், நெடுங்கால் உள்ளான் உள்ளிட்ட பறவைகளின் கால்கள் நீளமாக இருக்கும் என்பதால், அவற்றின் கணுக்கால் வரை நீர் நிரம்பியிருக்கும் போது, அவை நீரில் நடந்து சென்று, தங்களுக்கான இரையை தேடும்.இது ஒருபுறமிருக்க, வெளிநாடுகளில் இருந்து வரும் பறவைகள், பகல் நேரம் முழுக்க வெளியிடங்களுக்கு சென்று இரை தேடும்; மதிய நேரத்துக்கு மேல், குளத்தில் ஆங்காங்கே உள்ள மண் திட்டுகளில் அமர்ந்து இளைப்பாறும். குளத்தில் உள்ள மண் திட்டுகள் நீரில் மூழ்கும் போது, வலசை வரும் வெளிநாட்டு பறவைகளுக்கான வாழ்விடம் பாதிக்கப்படும். - இயற்கை ஆர்வலர்கள்.

பறவைகளின்றி மனிதர் வாழ முடியாது மனிதரின்றி பறவைகள் வாழ்ந்துவிடும் திருப்பூர், சிக்கண்ணா அரசு கலைக்கல்லுாரி என்.எஸ்.எஸ்., அலகு 2 திட்ட மாணவர்கள், நஞ்சராயன் பறவைகள் சரணாலயம் அழைத்து செல்லப்பட்டு, பறவை நோக்கலில் ஈடுபட்டனர். திருப்பூர் ரேஞ்சர் நித்யா தலைமை வகித்தார். வனவர் பிரேமா, மாணவர்கள் மத்தியில் பேசுகையில்,''ஒவ்வொரு பருவகால மாற்றத்தின் போதும், உள்மாநில மற்றும் வெளிநாட்டு பறவைகள், இனப் பெருக்கத்துக்காக வலசை வந்து செல்லும். எங்கோ பறந்து, திரிந்து, அலைந்து, இலை, தழை, காய், கனி ஆகியவற்றை உணவாக்கி கொள்ளும் பறவைகள் இடும் எச்சம் தான், மண்ணில் விழுந்து, மக்கி, அதிலிருந்து விதைகள் முளைக்கும். அவை மரம், செடி, கொடிகளாக மாறி, அந்த இடம் சோலை மற்றும் வனம் என்ற அடையாளத்தை பெறுகிறது. பல்லுயிர் பெருக்கம் மற்றும் இயற்கையை பேணி காப்பதில் பறவைகளின் பங்களிப்பு முக்கியம். பறவைகள் இல்லாமல் மனிதர்களால் வாழ முடியாது; ஆனால், மனிதர்கள் இல்லாமல் பறவைகள் வாழ்ந்து விடும்,'' என்றார். --- நஞ்சராயன் பறவைகள் சரணாலயத்தில் பறவை நோக்கலில் ஈடுபடும், சிக்கண்ணா கல்லுாரி மாணவிகள்.