வந்தவாசி தாலுகா தெள்ளார் அடுத்த காட்டேரி கிராமத்தைச் சேர்ந்தவர் கிருஷ்ணன், 60; இவர், தனது மனைவி திலகம், 55; மகன் விஸ்வநாதன், 27; மருமகன் மேகநாதன் மற்றும் உறவினர்கள் பவித்ரா, 20; பத்மபிரியா, 28; பாலாஜி, 30; ஆகியோர் தோஸ்த் வேனில் சமயபுரம் கோவிலுக்குச் சென்று நேற்று முன்தினம் இரவு திரும்பினர்.வேனை மேகநாதன் ஓட்டினார்.

நேற்று அதிகாலை 4:30 மணியளவில் விக்கிரவாண்டி டோல் கேட் அருகே வந்த போது முன்னால் நின்றிருந்த முட்டை லாரியின் மீது வேன் மோதியது.

இதில், வேனில் பயணம் செய்த விஸ்வநாதன், 27; திலகம், 55; பவித்ரா, 20; பத்மபிரியா, 28; ஆகிய 4 பேரும் காயமடைந்தனர். அனைவரும் சிகிச்சைக்காக முண்டியம்பாக்கம் அரசு மருத்துவக் கல்லுாரி மருத்துவமனையில் சேர்க்கப்பட்டனர். விபத்து குறித்து விக்கிரவாண்டி போலீசார் வழக்குப்பதிந்து விசாரித்து வருகின்றனர்.