விக்கிரவாண்டி, பாரதி நகரைச் சேர்ந்தவர் குமார், 60; வாணவெடி தயாரிப்பாளர். இவர் அதே பகுதியில் பக்கத்து தெருவில் சில மாதங்களுக்கு முன் புது வீடு கட்டி வசித்து வருகிறார். பழைய வீட்டை வாரம் ஒரு முறை பார்வையிட்டு செல்வது வழக்கம்.

நேற்று காலை குமார் பழைய வீட்டிற்குச் சென்று பார்த்தபோது, வீட்டின் பின்புற கதவு பூட்டு உடைக்கப்பட்டு, உள்ளே பீரோவில் இருந்த 10 சவரன் நகை மற்றும் 2 கிலோ வெள்ளி பொருட்கள் கொள்ளை போனது தெரியவந்தது.

விக்கிரவாண்டி போலீசார் மற்றும் தடயவியல் நிபுணர்கள் மோப்ப நாய் உதவியுடன் ஆய்வு செய்து தடயங்களை சேகரித்தனர். மேலும், கொள்ளை குறித்து வழக்குப் பதிந்து விசாரணை நடத்தி வருகின்றனர்.

சமீபகாலமாக விக்கிரவாண்டியில் தொடர் திருட்டுகள் நடைபெற்று வருவது பொதுமக்களிடையே அச்சத்தை ஏற்படுத்தியுள்ளது.