விழுப்புரம் மாவட்டம், முகையூர் அடுத்த வெள்ளம் புத்துார் கிராமத்தை சேர்ந்தவர்கள் அய்யனார், 23; வெங்கடேசன், 23: இருவரும் நேற்று முன்தினம் இரவு சுசுகி டூர் காரில் சென்னையில் இருந்து வீடு திரும்பினார்.

காரை அய்யனார் ஒட்டினார். நேற்று முன்தினம் நள்ளிரவு 1:30 மணியளவில் விக்கிரவாண்டி ஒன்றிய அலுவலகம் எதிரே வந்தபோது, காருக்கு முன்னால் சென்ற ஆம்னி பஸ் திடீரென பிரேக் அடித்ததால், பஸ் மீது கார் மோதியது. இதையடுத்து காருக்கு பின்னால் வந்த ஈச்சர் லாரி கார் மீது மோதியது.

இதில் பஸ் மற்றும் லாரிக்கிடையே சிக்கிய கார் அப்பளம் போல் நொறுங்கியது. காரில் பயணம் செய்த அய்யனார், வெங்கடேசன் இருவரும் படுகாயமடைந்தனர்.

தகவல் அறிந்த விக்கிரவாண்டி போலீசார், டோல் பிளாசா ஊழியர்கள் சம்பவ இடத்திற்கு விரைந்து சென்று இடிபாடுகளை அகற்றி காரில் சிக்கிய இருவரையும் மீட்டு முண்டியம்பாக்கம் அரசு மருத்துவக் கல்லுாரி மருத்துவமனையில் சேர்த்தனர்.

விபத்து குறித்து போலீசார் வழக்குப் பதிந்து விசாரணை செய்து வருகின்றனர்.