டிட்வா புயல் காரணமாக விழுப்புரம் மாவட்டத்தில் நேற்று முன்தினம் இரவு முதல் பரவலாக மழை பெய்து வருகிறது. இந்த புயலால் விழுப்புரம் மாவட்டத்திற்கு ரெட் அலர்ட் எச்சரிக்கை விடுக்கப்பட்டுள்ளது.

அதிகனமழையை எதிர்கொள்ளும் வகையில், மாவட்டம் முழுதும் முன்னெச்சரிக்கை நடவடிக்கை எடுக்கப்பட்டுள்ளது.

தமிழ்நாடு தீயணைப்பு மற்றும் மீட்பு பணிகள் துறை சார்பில் விழுப்புரம் மாவட்டத்தில் 10 தீயணைப்பு நிலையங்கள் உள்ளது. இங்கு, 200 பேர் பணிபுரிகின்றனர். இந்த தீயணைப்பு நிலையங்களில் மீட்பு பணிக்கான உபகரணங்கள் தயார் நிலையில் உள்ளது.

இது பற்றி, மாவட்ட தீயணைப்பு அலுவலர் ஜமுனாராணி கூறுகையில், 'தமிழ்நாடு தீயணைப்பு மற்றும் மீட்பு பணிகள் துறையின் விழுப்புரம் மண்டல இயக்குநர் தென்னரசு வழிகாட்டுதலின் பேரில், விழுப்புரம் மாவட்டத்தில் அதி கனமழையை எதிர்கொள்ள தீயணைப்பு துறை சார்பில் அனைத்து முன்னெச்சரிக்கை நடவடிக்கைகள் எடுக்கப்பட்டுள்ளது.

அவசர மீட்பு பணிகளில் ஈடுபட 20 பேர் கொண்ட கமாண்டோ குழுக்கள் தயார் நிலையில் உள்ளனர். அதே போல், நன்றாக நீச்சல் தெரிந்த 20 பேர் தனி குழுவாக நியமிக்கப்பட்டு தயார் நிலையில் உள்ளனர்.

இது மட்டுமின்றி, 6 ரப்பர் படகுகளும், மரம் அறுக்கும் எந்திரங்களும் அனைத்து வகையான கயிறு வகைகள் உட்பட பல்வேறு மீட்பு உபகரணங்கள் தயார் நிலையில் உள்ளது.

எந்தவித மீட்பு பணிகளாக இருந்தாலும் துரிதமாக செயல்பட்டு பொதுமக்களை காப்பாற்றும் நிலையில் உள்ளோம். அதே போல், பக்கத்து மாவட்டங்களுக்கு மீட்பு பணிக்கு செல்லவும் தயாராக இருக்கின்றோம்' என்றார்.