அருப்புக்கோட்டை நகராட்சி கூட்டம் தலைவர் சுந்தரலட்சுமி தலைமையில் நடந்தது. துணைத் தலைவர் பழனிச்சாமி, கமிஷனர் ராஜமாணிக்கம், இன்ஜினியர் அபூபக்கர் சித்திக் மற்றும் கவுன்சிலர்கள், அதிகாரிகள் கலந்து கொண்டனர் கூட்டத்தில் நடந்த விவாதங்கள் :

பாலசுப்பிரமணியன், (மா.கம்யூ.,): எனது 16 வது வார்டில் குடிநீர் உப்பு தண்ணீராகத்தான் வந்து கொண்டிருக்கிறது. வாறுகால்களும் அள்ளப்படுவது இல்லை. கழிவுநீர் நிறைந்துள்ளது.

பழனிச்சாமி, துணைத் தலைவர்: மேல்நிலைத் தொட்டி பணிகள் முடிவடைந்த உடன் உங்கள் வார்டு உட்பட ஒரு சில வார்டுகளுக்கு புதிய தாமிரபரணி குடிநீர் திட்டம் மூலம் குடிநீர் வழங்கப்படும்.

சுந்தரலட்சுமி, தலைவர்: மழைக்காலம் துவங்குவதை ஒட்டி நகரில் உள்ள அனைத்து வார்டுகளும் தூர்வாரும் பணி நடந்து வருகிறது.

ராமதிலகவதி, (அ.தி.மு.க.,) : நகரில் போதை பொருட்கள் புழக்கம் அதிகமாக உள்ளது. கட்டுப்படுத்துவதற்குரிய நடவடிக்கை எடுங்கள்.

ஜெயகவிதா, (தி.மு.க.): புறநகர் பகுதிகளில் போதை பொருட்களின் புழக்கம், குடித்துவிட்டு கும்மாளம் இடுவது அதிகம் நடக்கிறது. தேவையான நடவடிக்கை எடுக்க வேண்டும்.

அப்துல்ரகுமான், (தி.மு.க.,): தமிழக அரசு மக்களுக்கு இலவசமாக வழங்கும் செட்டில்மென்ட் பட்டாக்களுக்கு எனது வார்டில் இடைத்தரகர்கள் மூலம் 10 ஆயிரம், 20 ஆயிரம் என வருவாய்துறையினர் வாங்குவதாக புகார் வந்துள்ளது. நடவடிக்கை எடுங்கள்.

அகமது யாசீர், (தி.மு.க.,): ரயில்வே பீடர் ரோட்டில் போக்குவரத்திற்கும் இடையூராக ஆவின் பாலகம் உள்ளது. இதை அகற்ற நடவடிக்கை எடுக்க வேண்டும்.

இவ்வாறு விவாதங்கள் நடந்தது.