இ.குமாரலிங்கபுரம் கண்மாயில் 500 கியூபிக் மீட்டர் வண்டல் மண் அள்ள அனுமதிக்கப்பட்ட நிலையில் 5000 கியூபிக் மீட்டர் வரை கொள்ளையடிக்கப்பட்டது. இந்த விவகாரத்தில் சாத்துார் தாசில்தார் ராமநாதன் உட்பட 7 பேர் சஸ்பெண்ட் செய்யப்பட்டனர். இதில் வேளாண் உதவி அலுவலர் முத்துக்குரு விடுவிக்கப்பட்டார். நீர்வளத்துறை உதவி பொறியாளர் அனிதாவின் சஸ்பெண்ட் குறித்து கலெக்டரின் பரிந்துரையில் மதுரை தலைமை பொறியாளர் எந்த முடிவும் எடுக்காமல் உள்ளதால் வருவாய்த்துறையினர் 5 பேர் மட்டுமே சஸ்பெண்ட் ஆனதாக தெரிவிக்கப்பட்டது.

இந்த விவகாரத்தில் சஸ்பெண்ட் செய்யப்பட்ட 5 வருவாய்துறையினர், பரிந்துரைக்கப்பட்ட வேளாண், நீர்வளத்துறையை சேர்ந்த இருவர் ஆகியோரிடம் சிறப்பு விசாரணை அதிகாரி டி.ஆர்.ஓ., ஆனந்தி விசாரித்தார். இதுகுறித்து அறிக்கை கலெக்டர் ஜெயசீலனிடம் சமர்பிக்கப்பட்டது.

இதையடுத்து துணை தாசில்தார் நவநீதன், வருவாய் ஆய்வாளர் தனலட்சுமி, வி.ஏ.ஓ., அஜிதா, கிராம உதவியாளர் குருசாமி ஆகிய 4 பேரின் சஸ்பெண்ட் ரத்து செய்யப்பட்டு 17 (அ)' பிரிவின் கீழ் குற்றக்குறிப்பாணை வழங்கி விளக்கம் கேட்க மாவட்ட நிர்வாகம் நடவடிக்கை எடுத்துள்ளது. தாசில்தார் ராமநாதன் மீதான சஸ்பெண்ட் தொடர்கிறது.