நேற்று முன்தினம் முதல் இன்று வரை மூன்று நாட்கள் தொடர் விடுமுறை உள்ள நிலையில் பங்குனி மாத அமாவாசையை முன்னிட்டு நேற்று முன் தினம் சதுரகிரி சுந்தர மகாலிங்கம் கோயிலில் தமிழகத்தின் பல்வேறு மாவட்டங்களைச் சேர்ந்த 7 ஆயிரத்துக்கும் மேற்பட்ட பக்தர்கள் சுவாமி தரிசனம் செய்தனர்.

இந்நிலையில் நேற்று ஞாயிற்றுக்கிழமை என்பதால் கொல்லம், பொதிகை,சிலம்பு ரயில்கள் மூலம் சென்னை உட்பட வட மாவட்டங்களைச் சேர்ந்த ஏராளமான பக்தர்கள் ஸ்ரீவில்லிபுத்துார் வந்தனர். அதிகாலை 5:00 மணி முதல் இயக்கப்பட்ட சிறப்பு பஸ்கள் மூலம் தாணிப்பாறை சென்றனர். வெயிலின் தாக்கம் அதிகமாக காணப்பட்ட நிலையிலும் மதியம் 12:00 மணி வரை 3 ஆயிரத்துக்கும் மேற்பட்ட பக்தர்கள் மலையேறினர்.

கோயிலில் சுந்தரமகாலிங்கம், சந்தனமகாலிங்கம், சுந்தரமூர்த்தி சுவாமிகளை வரிசையில் நின்று தரிசித்தனர். வத்திராயிருப்பு, சாப்டூர் போலீசார் மற்றும் வனத்துறையினர் பாதுகாப்பு பணியில் ஈடுபட்டனர். ஸ்ரீவில்லிபுத்துாரில் இருந்து சிறப்பு பஸ்கள் இயக்கப்பட்டது.