ADDED : ஜூலை 19, 2026 11:18 PM
ஸ்ரீவில்லிபுத்துார்: சதுரகிரி சுந்தரமகாலிங்கம் கோயிலில் ஆடி அமாவாசை திருவிழா ஆக. 12ல் நடக்கிறது. இந்நாளில் கூட்ட நெரிசலை தவிர்க்க ஆக. 8 முதல் 13 வரை சுவாமி தரிசனம் செய்ய அனுமதிக்க வேண்டும் என பக்தர்கள் எதிர்பார்க்கின்றனர்.
இக்கோயிலில் ஆக.10ல் பிரதோஷம், ஆக.11ல் சிவராத்திரி, ஆக.12-ல் ஆடி அமாவாசை வழிபாடு நடக்கிறது.
தற்போது மாதாந்திர அமாவாசை, பவுர்ணமி வழிபாட்டை முன்னிட்டு காலை 6:00 முதல் மதியம் 12:00 மணி வரை மட்டுமே பக்தர்கள் அனுமதிக்கப்படுகின்றனர்.
ஆனால் ஆடி அமாவாசை தினத்தன்று பல மாவட்டங்களில் இருந்து ஏராளமான பக்தர்கள் வருகை தருவர். அப்போது கூட்ட நெரிசலை தவிர்க்க ஆக. 8 முதல் 13 வரை அதிகாலை 4:00 முதல் மதியம் 2:00 மணி வரை மலையேற அனுமதிக்க வேண்டும் என பக்தர்கள் எதிர்பார்க்கின்றனர்.
அதேபோல் போதிய அளவிற்கு குடிநீர், உணவு, மருத்துவம், தீயணைப்பு வசதிகளை செய்து தர வேண்டும் என அரசிடம் பக்தர்கள் வலியுறுத்தி உள்ளனர்.
