ராஜபாளையம் நகராட்சி கூட்டம் தலைவர் பவித்ரா தலைமையில் நடந்தது. கமிஷனர் நாகராஜ், துணைத் தலைவர் கல்பனா, அதிகாரிகள், கவுன்சிலர்கள் கலந்து கொண்டனர்.

கூட்டத்தில் நடந்த விவாதம்

ராதா,(தி.மு.க.,): பச்சமடம் பகுதியில் மூன்று தெருக்கள் புதிதாக ரோடு போடாமல் வைத்துள்ளனர். கோரிக்கை வைத்து இரண்டு வருடங்களுக்கு மேல் ஆகிறது.

பவித்ரா, நகராட்சித் தலைவர்: பேவர் பிளாக் தெரு ஒதுக்கீட்டை தார் சாலையாக மாற்றி கேட்டுள்ளதால் இத்தாமதம். சென்னைக்கு சென்று அதிகாரியிடம் முறையிட்டுள்ளேன். விரைவில் பணிகள் தொடங்கும்.

ரா. சங்கர் கணேஷ், (காங்.,): பாதாள சாக்கடை, தாமிரபரணி குடிநீர் திட்டம், பணிகள் நகராட்சியிடம் முறையாக ஒப்படைக்கப்பட்டு விட்டதா. தற்போது நடைபெறும் பராமரிப்பு செலவுகள் யார் பொறுப்பு.

நாகராஜன், கமிஷனர்: 15 பிளாக்குகளில் 9 வரை சோதனை பணிகள் முடிவடைந்துள்ளது. தற்போது வரை அழுத்தம் தாங்குவதற்கான தொடர் சோதனை பராமரிப்பு நடந்து வருகிறது. அனைத்தும் முடிந்தபின் நகராட்சி பொறுப்பு ஏற்கும்.

ராஜ், (தி.மு.க.,): தெருவில் பேவர் பிளாக் பதிக்க செல்லும் போது தார் ரோடு வேண்டும் என எதிர்ப்பு தெரிவிக்கின்றனர். முதலிலேயே ஆய்வு செய்தால் இப்பிரச்சினை ஏற்படாது.

பவித்ரா, நகராட்சி தலைவர்: நகராட்சி கவுன்சிலுக்கு முன்பே இவை முடிவு செய்யப்பட்டுள்ளதால் மாற்றுவது கடினம். புதிதாக ஒதுக்கும்போது ஆலோசிக்கப்படும்.

ராதாகிருஷ்ண ராஜா, (தி.மு.க.,): நகர் நடுப்பகுதி செல்லும் ஓடைகள் துார்வார வில்லை. சாக்கடை அடைப்பு ஏற்படுகிறது. மற்ற பகுதிகளில் நடக்கும் போது இதையும் சரி செய்ய வேண்டும்.

சக்திவேல், சுகாதார அலுவலர்: பொதுப்பணித்துறை சாக்கடை பாலம் போட்டுள்ளதாலும், ஆக்கிரமிப்பு காரணமாகவும் துார்வாரும் வாகனங்கள் உள் நுழைய முடியவில்லை. மழைக்கான அவசர பணிகள் மட்டும் நடைபெறுகிறது.

ஞானவேல், (தி.மு.க.,): தாமிரபரணி குடிநீர் நகராட்சியிடம் ஒப்படைக்கப்படாத போது பராமரிப்பு பணி என ஆட்களை ஒதுக்குவது ஏன். இந்த செலவினங்களுக்கு யார் பொறுப்பு.

முகமது ஷரீப், இன்ஜினியர்: நகராட்சியிடம் ஒப்படைக்கப்படவில்லை. அவசரத்திற்கு ஆட்கள் ஒதுக்கப்படுகிறது. இனி நடைபெறாது.

ஏ.டி.சங்கர் கணேஷ், (காங்): மின் மயான பணிகள் தாமதத்திற்கு காரணம் என்ன. விரைவு படுத்த வேண்டும்.

அழகர்சாமி, மின் அலுவலர்: உயர் மின் அழுத்த இணைப்புக்காக மின்வாரியத்தினரின் பணி நிலுவையில் உள்ளது. முடிந்தவுடன் நடைமுறைக்கு வரும்.

சோலைமலை, (அ.தி.மு.க.,): எனது வார்டில் பள்ளமான பகுதிகளில் மட்டும் தாமிரபரணி குடிநீர் இணைப்பு கொடுத்துள்ளனர். 80 சதவீதத்தினருக்கு சப்ளை கிடைக்கவில்லை.

இவ்வாறு விவாதம் நடந்தது. 147 தீர்மானங்கள் நிறைவேற்றப்பட்டன.