சிவகாசி சிறுகுளம் கண்மாயில் குப்பை கொட்டுவதாலும் கழிவு நீர் கலப்பதாலும் துர்நாற்றம் ஏற்படுத்தியதோடு சுகாதார கேடும் ஏற்பட்டது. மேலும் கண்மாய் கரை முழுவதுமே திறந்த வெளி கழிப்பறையாக மாறியதால் அப்பகுதி குடியிருப்புவாசிகள் பெரிதும் சிரமப்பட்டனர்.

எனவே கண்மாயில் குப்பை கொட்டுவதையும் கழிவு நீர் கலப்பதை தடுப்பதற்காகவும் கரையில் இரண்டு மீட்டர் அகலம், 841 மீட்டர் நீளத்திற்கு புதிய நடைபாதை அமைக்கவும், தெருவிளக்குகள், இருக்கைகள் உள்ளிட்ட கட்டமைப்பு வசதிகளை மேம்படுத்தி பூங்கா அமைக்கவும் ரூ 1.10 கோடி நிதி ஒதுக்கீடு செய்யப்பட்டு 2022 செப். ல் பூமி பூஜை போடப்பட்டது.

ஆனால் பணிகள் தொடர்ந்து நடைபெறாமல், பல்வேறு கோரிக்கைகளுக்குப் பிறகு ஒரு ஆண்டுக்குப் பின்னர் கரையில் நடைபாதை அமைக்கும் பணி துவங்கியது. இருக்கைகள், தெருவிளக்கு வசதி, பாதுகாப்பு வேலி ஏற்படுத்தப்பட்டது. ஆனால் கண்மாய் கரையை சீரமைக்காமல் நடைபாதை அமைக்கப்பட்டுள்ளது.

இதனால் நடைபாதை முழுவதுமே முட்புதர்கள் செடிகள் ஆக்கிரமித்துள்ளதால், இவ்வளவு வசதிகள் ஏற்படுத்தியும் மக்கள் பயன்படுத்த முடியவில்லை. பாம்பு உள்ளிட்ட விஷப்பூச்சிகளின் நடமாட்டமும் உள்ளது. எனவே கரையை சீரமைத்து நடைபாதையில் உள்ள செடிகளை அகற்ற வேண்டும் என மக்கள் எதிர்பார்க்கின்றனர்.