இந்நிலையில், கூடுதல் வரதட்சணையாக கார் வேண்டும் என, டிங்கு கேட்டுள்ளார். அதுவும் வாங்கி தரப்பட்ட நிலையில், டிங்குவின் நடவடிக்கைகளில், தவறான மாற்றங்கள் சுப்ரியாவிற்கு தெரிந்தது. இதனால், இருவருக்கும் இடையே அடிக்கடி பிரச்னை வந்துள்ளது. மேலும், 'டிவி' சீரியல் தயாரிக்க டிங்கு, 20 லட்சம் ரூபாய் கேட்டதால், சுப்ரியா மனமுடைந்தார். கேட்ட பணத்தை தர முடியாததால், கடந்தாண்டு ஜூலை மாதம், முகப்பேரில் உள்ள பெற்றோர் வீட்டிற்கு சுப்ரியா சென்று விட்டார்.

இதற்கிடையே, மனைவிக்கு தெரியாமல் 'டிவி' நாடக நடிகை ஒருவரை, டிங்கு திருமணம் செய்துள்ளதாக தெரிகிறது. இதைப்பற்றி இப்போது தகவலறிந்த சுப்ரியா, அண்ணா நகர் துணைக்கமிஷனர் பிரேமானந்த் சிங்காவிடம் புகார் கொடுத்தார். அவரது உத்தரவை அடுத்து, திருமங்கலம் அனைத்து மகளிர் போலீஸ் நிலையத்தில், வழக்கு பதிவு செய்யப்பட்டுள்ளது.

நடிகர் கைதாவாரா?

இந்த விவகாரத்தில், போலீசார் எந்நேரத்திலும் கைது செய்வார்கள் என்பதால், முன்ஜாமின் கேட்டு, சென்னை முதன்மை செஷன்ஸ் கோர்ட்டில் மனுதாக்கல் செய்துள்ளார். 'வரதட்சணை கேட்டு கொடுமை செய்ததாக எனக்கு எதிராக, என் மனைவி சுப்ரியா புகார் கொடுத்துள்ளார். வேறொரு பெண்ணை திருமணம் செய்திருப்பதாகவும் கூறியுள்ளார். எனக்கும், சுப்ரியாவுக்கும் சென்னையில் திருமணம் நடந்தது. எங்களுக்கு, ஐந்து வயதில் மகள் உள்ளார். நாங்கள் மகிழ்ச்சிகரமாக வாழ்ந்தோம். மகள் பிறந்த பின், என்னிடம் சுப்ரியா தகராறு செய்தார்.

'கடந்த 28ம் தேதி என் வீட்டுக்கு, போலீசார் எனக் கூறிக்கொண்டு சிலர் வந்தனர். அவர்களுடன் வருமாறு அழைத்தனர். அடையாள அட்டையை காட்டுமாறு அவர்களிடம் கூறினேன். அவர்கள் திரும்பி வருவதாக கூறிச் சென்றனர். என்னை இந்த வழக்கில் கைது செய்யக்கூடும். எனவே, முன்ஜாமின் வழங்க வேண்டும்' என கோரியுள்ளார்.

இம்மனு, நீதிபதி தேவதாஸ் முன் விசாரணைக்கு வந்தது. முன்ஜாமின் வழங்கக் கூடாது என, சுப்ரியா சார்பில் மூத்த வழக்கறிஞர் ஏ.நடராஜன் எதிர்ப்பு தெரிவித்தார். இதையடுத்து, விசாரணையை 20ம் தேதிக்கு நீதிபதி தேவதாஸ் தள்ளி வைத்தார். அருண்காந்த், சுப்ரியா இருவரும் 19ம் தேதி கவுன்சிலிங் முன் ஆஜராகவும் நீதிபதி உத்தரவிட்டார்.