அவற்றின் மூலம் தினமும், 5 கோடி முட்டைகள் உற்பத்தி செய்யப்படுகின்றன. அந்த முட்டைகள், தமிழக அரசின் சத்துணவு திட்டம், வெளிநாட்டுக்கு ஏற்றுமதி செய்யப்படுகின்றன.

தேசிய முட்டை ஒருங்கிணைப்பு குழுவான நெக், தினமும் முட்டை விலையை அறிவித்து வருகிறது. கடந்த ஏப்., 1ல் கொள்முதல் விலை, 415 காசாக நிர்ணயிக்கப்பட்டது. தொடர்ந்து ஏற்றம் காணப்பட்டு, 18ல், 440 காசாக நிர்ணயிக்கப்பட்டது.

பின், படிப்படியாக இறங்கி, 29ல், 415 காசுக்கு விற்பனை செய்யப்பட்டது. தொடர்ந்து கொள்முதல் விலை படிப்படியாக உயர்ந்து, நேற்று முன்தினம், 510 காசாக நிர்ணயிக்கப்பட்டது. நேற்று மேலும், 5 காசு அதிகரித்து, 515 காசாக விற்பனை செய்யப்பட்டது.

முட்டைக்கோழி பண்ணையாளர் சம்மேளன துணைத்தலைவர், வாங்கிலி சுப்ரமணியம் கூறியதாவது:

கோடை வெயில் தாக்கம் நாளுக்கு நாள் அதிகரித்து வருவதால், அதன் தாக்கத்தை தாங்காமல், 2 வாரங்களில், 90 லட்சம் கோழிகள் இறந்துள்ளன. மின் வினியோகமும் சரியாக இல்லாததால் கோழிகளுக்கு தண்ணீர் வழங்க முடியவில்லை.

கடந்த 45 ஆண்டுகளில், குஞ்சுகள் இறந்தது இல்லை. ஆனால் தற்போது ஒரே நாளில், 10 முதல், 15 சதவீத கோழிக்குஞ்சுகள் இறந்துள்ளன. முட்டை உற்பத்தி, 20 சதவீதம் வரை சரிந்துள்ளது. தினமும், 5 கோடி முட்டை உற்பத்தி செய்த நிலையில், தற்போது, 3.50 கோடியாக குறைந்துள்ளது. அதனால் முட்டை தட்டுப்பாடு ஏற்பட வாய்ப்புள்ளது.

இதே நிலை நீடித்தால், முட்டை கொள்முதல் விலை, 600 காசுக்கு மேல் உயர வாய்ப்புள்ளது. இரவில் தண்ணீர் சூடாக இருப்பதால் கோழிகள் தண்ணீர் குடிப்பதில்லை; அதனால் இறக்கின்றன. இவ்வாறு அவர் கூறினார்.