தமிழக ரேஷன் கடைகளில், கட்டுப்பாடற்ற பிரிவின் கீழ் மளிகை, எண்ணெய் உள்ளிட்ட பொருட்கள் விற்கப்படுகின்றன. அவற்றை கார்டுதாரர்களிடம், ஊழியர்கள் கட்டாயப்படுத்தி விற்கின்றனர். இதுகுறித்து, நம் நாளிதழில் நேற்று முன்தினம் செய்தி வெளியானது.

இதுகுறித்து, கூட்டுறவு துறை அதிகாரி ஒருவர் கூறியதாவது:

சென்னை தலைமை செயலகத்தில் வெள்ளிக்கிழமை கூட்டுறவு துறை உயரதிகாரிகள் பங்கேற்ற ஆலோசனை கூட்டம் நடந்தது. அதில், 'ரேஷன் கடைகளில் கார்டுதாரர்களிடம் எந்த பொருளையும் கட்டாயப்படுத்தி விற்க கூடாது; அவ்வாறு செய்யும் ஊழியர் மீது நடவடிக்கை எடுக்க வேண்டும்; கட்டாயப்படுத்தி விற்றால் புகார் அளிப்பது குறித்து கடைகளில் விளம்பரம் செய்ய வேண்டும்' என்று கூறப்பட்டுள்ளது.

இந்த தகவல், கூட்டுறவு பண்டகசாலை மற்றும் கூட்டுறவு சங்க அதிகாரிகளிடம் தெரிவிக்கப்பட்டு உள்ளது.

இவ்வாறு அவர் கூறினார்.