நீலகிரி தொகுதியில் தேர்தல் பிரசாரத்தில் எல்.முருகன் பேசியதாவது: சமூகநீதி பற்றி பேசுவதற்கு முதல்வர் ஸ்டாலினுக்கு அருகதை இல்லை. எம்.பி.,யாக தேர்ந்தெடுக்கப்பட்டு ஐந்தாண்டு காலமாக நமது மக்களின் நம்பிக்கைக்குரிய கடவுளான, ஹெத்தையி அம்மன் கோவிலுக்கு வருகை தராத ஊழல் ராசா, இப்போது தேர்தல் வந்ததும் தேடிச் சென்று வழிபாடு நடத்திக் கொண்டிருக்கிறார்.

தமிழை வைத்து திமுகவினர் அரசியல் லாபம் தேடி வருகின்றனர். எந்தெந்த திட்டங்களில் ஊழல் செய்யலாம் என்பது பற்றி தான் திமுகவினருக்கு கவனம் இருக்கும். தமிழக முதல்வர் தமிழ் மீது அக்கறை உள்ளவர் போல போலியாக வேஷம் போட்டு நடித்துக்கொண்டு இருக்கிறார். ஆனால் உண்மையிலேயே தமிழை போற்றுவது பிரதமர் மோடி மட்டும் தான். சர்வதேச அளவில் 35 மொழிகளில் திருக்குறள் வெளியிடப்பட்டு உள்ளது.

பிரதமர் மோடி இன்றைக்கு உலக நாடுகளுக்கு மத்தியில் தமிழரின் பண்பாட்டை பேசி வருகிறார். தி.மு.க, எம்.பி ஆ.ராசாவின் வாகனத்தை தேர்தல் பறக்கும் படையினர் மெத்தனமாக சோதனை செய்துள்ளனர். தேர்தல் நேரம் என்பதால் ஆளும் கட்சியினர் என்று பாகுபாடு பாராமல் செயல்பட வேண்டும். தமிழகத்தில் தேர்தல் அதிகாரிகளின் செயல்பாடு தி.மு.க.வினருக்கு ஆதரவாக உள்ளது. இவ்வாறு அவர் பேசினார்.

கிரிக்கெட் விளையாடி ஓட்டு சேகரித்த எல்.முருகன்!

மத்திய அமைச்சரும், நீலகிரி பா.ஜ., வேட்பாளர் எல்.முருகன் இன்று நீலகிரி மஞ்சூர் பகுதியில் ஓட்டு சேகரிக்க சென்ற போது அங்குள்ள இளைஞர்களோடு கிரிக்கெட் விளையாடினார்.

பா.ஜ., பிரசார வாகனத்தில் அ.தி.மு.க., கொடி!

நீலகிரியில் பா.ஜ., பிரசார வாகனத்தில் கூட்டணி கட்சி கொடிகளோடு அ.திமுக கொடியும் இருந்ததால் சலசலப்பு ஏற்ப்பட்டது. இதையடுத்து, பா.ஜ., வேட்பாளர் எல்.முருகன் சொன்னதை அடுத்து வாகனத்தில் இருந்த அதிமுக கொடி அகற்றப்பட்டது.