டி.ஜி.பி., ரேங்க் ஐ.பி.எஸ்., அதிகாரியான சந்தீப் ராய் ரத்தோட், சென்னை போலீஸ் கமிஷனராக பணியாற்றி வந்தார். அவர், செங்கல்பட்டு மாவட்டம் ஊனமாஞ்சேரியில் உள்ள, போலீஸ் அகாடமியின் இயக்குனராக மாற்றப்பட்டார்.

அதேபோல, மாநில சட்டம் - ஒழுங்கு கூடுதல் டி.ஜி.பி.,யாக இருந்த அருண், சென்னை போலீஸ் கமிஷனராக நியமிக்கப்பட்டுள்ளார்.

டி.ஜி.பி., அலுவலகத்தில், தலைமையிடத்து கூடுதல் டி.ஜி.பி.,யாக பணிபுரிந்து வந்த டேவிட்சன் தேவாசீர்வாதம், மாநில சட்டம் - ஒழுங்கு கூடுதல் டி.ஜி.பி.,யாக நியமிக்கப்பட்டு உள்ளார். இதற்கான உத்தரவை, உள்துறை செயலர் அமுதா நேற்று பிறப்பித்துள்ளார்.

சென்னை வேப்பேரியில் உள்ள கமிஷனர் அலுவலகத்தில், கமிஷனராக பொறுப்பேற்ற பின், அருண் கூறியதாவது:

சட்டம் - ஒழுங்கு பிரச்னை, குற்றத் தடுப்பு, ரவுடியிசம் ஒழிப்பு உள்ளிட்ட பணிகளுடன், போக்குவரத்து தொடர்பான சிக்கல்களுக்கும் தீர்வு காணப்படும்.

காவல் துறையில் உள்ள ஊழல் மற்றும் கட்டப்பஞ்சாயத்து உள்ளிட்டவற்றை கட்டுக்குள் கொண்டு வருவதும், என் முதன்மையான கடமையாக இருக்கும்.

இவ்வாறு அவர் கூறினார்.