ஒவ்வொரு தேர்தலின் போதும், வாக்காளர்களுக்கு பூத் சிலிப்பை, ஓட்டுச்சாவடி அலுவலர்கள் வீடு வீடாகச் சென்று வழங்குவர். இந்த முறை பூத் சிலிப் வழங்குவது போல, வாக்காளர் கையேடு வழங்க உள்ளனர்.

இதுகுறித்து, தமிழக தலைமை தேர்தல் அதிகாரி சத்யபிரதா சாஹு கூறியதாவது:

வாக்காளர் கையேடு, எட்டு பக்கங்கள் கொண்டதாக அச்சிடும் பணி நடந்து வருகிறது. முதல் முறையாக வீடு தோறும் ஓட்டுச்சாவடி அலுவலர்கள் சென்று, வாக்காளர் கையேடு வழங்க உள்ளனர். மொத்தம் 2 கோடி வீடுகளுக்கு, வாக்காளர் கையேடு வழங்கப்பட உள்ளது.

இக்கையேட்டில், வாக்காளர் பட்டியலில் பெயர் பதிவு செய்யும் வழிமுறை; வாக்காளர் பட்டியலில் பெயர் இருப்பதை அறிந்து கொள்ளுதல்; ஓட்டுப்பதிவு நாள்; ஓட்டுப்பதிவுக்கு எடுத்து வர வேண்டிய ஆவணங்கள் குறித்த விளக்கம் இருக்கும்.

தேர்தல் விதி மீறல் குறித்து, 'சி விஜில்' மொபைல் போன் செயலியில் புகார் அளிப்பது எப்படி; ஓட்டளிப்பதற்கான வழிமுறை; தேர்தல் கமிஷனின் பல்வேறு விதமான மொபைல் செயலிகள் குறித்த விளக்கம்; வாக்காளர் உறுதிமொழி போன்றவை இடம் பெற்றுள்ளன.

இதேபோல், 'KYC' என்ற மொபைல் போன் செயலி உருவாக்கப்பட்டுள்ளது. இதை பதிவிறக்கம் செய்து, வாக்காளர்கள் தங்கள் லோக்சபா தொகுதியில் போட்டியிடும் வேட்பாளர்; அவர் மீதுள்ள குற்ற வழக்குகள்; அவரது சொத்து விபரம் போன்றவற்றை அறிந்து கொள்ளலாம்.

இவ்வாறு அவர் கூறினார்.