இந்தியா முழுவதும் சதுப்பு நிலங்கள் பாதுகாப்பு தொடர்பாக, உச்ச நீதிமன்றம் பிறப்பித்த உத்தரவின் அடிப்படையில், சென்னை உயர் நீதிமன்றம் தாமாக முன்வந்து வழக்கை விசாரணைக்கு எடுத்தது. இந்த வழக்கு, தலைமை நீதிபதி எஸ்.வி.கங்காபுர்வாலா, நீதிபதி சத்தியநாராயண பிரசாத் அடங்கிய, 'முதல் பெஞ்ச்' முன், விசாரணைக்கு வந்தது.

தமிழக அரசு தரப்பில், முன்னோடி திட்டமாக, திருவள்ளூர் மாவட்டத்தில் சதுப்பு நிலங்கள் அடையாளம் காணப்பட்டுள்ளதாக தெரிவிக்கப்பட்டது. இதையடுத்து, ஜூன் முதல் அனைத்து மாவட்டங்களிலும் சதுப்பு நிலங்களை அடையாளம் காணும் பணியை மேற்கொள்ளும்படி, தமிழக அரசுக்கு முதல் பெஞ்ச் உத்தரவிட்டது. இதுகுறித்து, அவ்வப்போது அறிக்கை தாக்கல் செய்யவும் அரசுக்கு அறிவுறுத்தியது.

அடையாளம் காணும் பணிகளுக்காக, நிபுணர்களின் சேவையை பயன்படுத்திக் கொள்ள, அரசுக்கு அனுமதி அளித்த முதல் பெஞ்ச், விசாரணையை, ஜூலை முதல் வாரத்துக்கு தள்ளி வைத்தது.