சிறப்பு ரயில்களிலும் கூடுதலாக முன்பதிவு இல்லாத பெட்டிகள்
சிறப்பு ரயில்களிலும் கூடுதலாக முன்பதிவு இல்லாத பெட்டிகள்
ADDED : மார் 22, 2026 03:39 AM

சென்னை: 'சிறப்பு ரயில்களில், கூடுதலாக முன்பதிவு இல்லாத பெட்டிகள் இணைக்கப்படுகின்றன' என, தெற்கு ரயில்வே அதிகாரிகள் தெரிவித்துள்ளனர்.
ரயில்வே வாரியத்தின் உத்தரவை தொடர்ந்து, கடந்த ஒரு ஆண்டாக, விரைவு ரயில்களில் கூடுதல் முன்பதிவு இல்லாத பெட்டிகள் இணைத்து இயக்கப்பட்டு வருகின்றன.
தெற்கு ரயில்வேயில், சென்னை சென்ட்ரல் - டில்லி, ஏற்காடு, போடிநாயக்கனுார், எழும்பூர் - திருநெல்வேலி, துாத்துக்குடி, தாம்பரம் - செங்கோட்டை உட்பட 40க்கும் மேற்பட்ட விரைவு ரயில்களில், கூடுதலாக முன்பதிவு இல்லாத பெட்டிகள் இணைக்கப்பட்டுள்ளன.
தற்போது, சிறப்பு ரயில்களிலும் கூடுதல் பெட்டிகள் இணைத்து இயக்கப்படுகின்றன.
இது குறித்து, தெற்கு ரயில்வே அதிகாரிகள் கூறியதாவது:
அனைத்து விரைவு ரயில்களிலும், நான்கு முன்பதிவு இல்லாத பெட்டிகளை இணைக்க, வாரியம் உத்தரவிட்டுள்ளது.
அதன்படி, தெற்கு ரயில்வேயில் திட்டமிட்டுள்ள, 51 ஜோடி விரைவு ரயில்களில், இதுவரை 40க்கும் அதிகமான விரைவு ரயில்களில், கூடுதல் பெட்டிகள் நிரந்தரமாக இணைத்து இயக்கப்படுகின்றன.
புதிய பெட்டிகள் வந்ததும், எஞ்சியுள்ள விரைவு ரயில்களில், கூடுதலாக முன்பதிவு இல்லாத பெட்டிகள் இணைக்கப்படும்.
இதேபோல், பயணியர் தேவையை கருத்தில் வைத்து இயக்கப்படும், சிறப்பு ரயில்களிலும், இனி வரும் நாட்களில் மூன்று அல்லது நான்கு முன்பதிவு இல்லாத பெட்டிகளை இணைத்து இயக்க, நடவடிக்கை எடுத்து வருகிறோம்.
இவ்வாறு அவர்கள் கூறினர்.
