தமிழகத்தில் ஆதிதிராவிடர் நலத்துறையில் 1331 பள்ளி, கல்லுாரி, தொழிற்பயிற்சி, பாலிடெக்னிக் விடுதிகள் உள்ளன. இங்கு தங்கும் பள்ளி மாணவருக்கு ஒரு மாத உணவு கட்டணம் ரூ.1400. கல்லுாரி மாணவருக்கு ரூ.1500. இதனை அரசே வழங்குகிறது.

தமிழ்நாடு நுகர்பொருள் வாணிப கழகம் மூலம் அரிசியை மானிய விலையிலும், பிற பொருட்கள் கூட்டுறவு கடைகள் மூலமும் வழங்கப்படுகிறது. இந்தக் கல்வி ஆண்டு ஜூனில் துவங்கியது. விடுதி வசதி கேட்ட அனைவரையும் சேர்க்க இயக்குனர் அலுவலகத்தில் அறிவுறுத்தினர்.

ஆகஸ்டில் 'நல்லோசை' செயலியில் விடுதி மாணவர்களின் விவரத்தை பதிவேற்றம் செய்யும்போது, தொழில்நுட்ப கோளாறால் தாமதம் ஏற்பட்டது.

இந்தாண்டுக்கான உணவுக் கட்டணத்தை அனுமதித்த போது, நல்லோசை செயலியில் பதிவேற்றம் செய்த மாணவர்களுக்கு மட்டும் உணவுக் கட்டணத்தை இயக்குனர் அலுவலகம் விடுவித்தது. புதிதாக தேர்வான 22 ஆயிரம் மாணவர்களுக்கான 6 மாத உணவுக் கட்டணத்தை விடுவிக்காமல் உள்ளனர். இதனால் விடுதி காப்பாளர்கள் சொந்த பணத்தில் மேற்படி செலவுகளை செய்து சிரமப்படுகின்றனர்.

ஒரு விடுதி காப்பாளர் உணவுக் கட்டணத்தை பணமாக்க பட்டியல் தயாரித்து, தாசில்தார் ஒப்புதல் பெற்று, மாவட்ட அலுவலக கண்காணிப்பாளரிடம் சான்றொப்பம் பெற வேண்டும். அந்த பட்டியலை கருவூலத்தில் பணமாக்கி வரவேண்டும். இதற்காக அலுவலகங்களுக்கு சென்று வர செலவாகும் தொகை அதிகம் என்பதால், நிலுவைத் தொகை வந்த பின், வழக்கமான ஒதுக்கீடையும் பெறலாம் என காத்திருக்கின்றனர்.

அதேசமயம் விடுதிகளுக்கு இணையகட்டணம், பத்திரிகைகள், நல்லோசை செயலியை செயல்படுத்த 'அவுட்சோர்ஸிங்' மூலம் நியமித்துள்ள ஊழியர்கள் என ரூ. பல லட்சம் செலவு இத்துறையால் செய்யப்படுகிறது. ஒருபுறம் விடுதியை வெள்ளையடிப்பதும், மற்றொரு புறம் கட்டடங்களை இடித்துவிட்டு, தாட்கோ மூலம் கட்டப்படுவதும் நடக்கிறது.

ஆனால் மாணவர்களுக்கான செலவுத் தொகையை மட்டும் வழங்காமல் இழுத்தடிக்கின்றனர்.

அரசுதான் கவனிக்க வேண்டும் என மனம் வெதும்புகின்றனர் காப்பாளர்கள்.