தே.மு.தி.க., மாவட்ட செயலர்கள் கூட்டம், சென்னை கோயம்பேட்டில் உள்ள கட்சியின் தலைமை அலுவலகத்தில் நேற்று நடந்தது. பொதுச் செயலர் பிரேமலதா தலைமை வகித்தார்.

கூட்டத்தில் நிறைவேற்றப்பட்ட தீர்மானங்கள்:

* வரும் 28ம்தேதி, விஜயகாந்த் ஓராண்டு நினைவு தினத்தை ஒட்டி, தமிழகம் முழுதும் கட்சியினர், பொதுமக்கள் ஒன்று சேர்ந்து, அஞ்சலி செலுத்தி உறுதி மொழி ஏற்போம்.

* கள்ளச்சாராய விற்பனையை தடுக்க, கடும் சட்டம் இயற்ற வேண்டும். மதுக்கடைகளை நிரந்தரமாக மூடி, பூரண மதுவிலக்கை அமல்படுத்த வேண்டும்.

* போதைப்பொருட்களால் பாலியல் வன்கொடுமைகள் அதிகரித்து வருகின்றன. கொலை, கொள்ளை அதிகமாகிறது. இவற்றை கடுமையான சட்டங்களால் தடுத்து நிறுத்த, மத்திய, மாநில அரசுகள் உறுதியான நடவடிக்கை எடுக்க வேண்டும் .

* டிசம்பரில், சென்னை மற்றும் பிற மாவட்டங்களில் கனமழை இருக்கும் என, வானிலை ஆய்வு மையம் எச்சரித்துள்ளது. எனவே, போர்க்கால அடிப்படையில் திட்டங்களை தீட்டி, சாலைகள் மற்றும் போக்குவரத்தை திறம்பட மாநில அரசு செயல்படுத்த வேண்டும்.

* மாநகராட்சி சொத்து வரியை மீண்டும் அதிகமாக உயர்த்தி, மக்களுக்கு கடுமையான சுமையை ஏற்படுத்தி உள்ளது அரசு. எனவே, சொத்துவரி உயர்வை திரும்பப் பெற வேண்டும்.

* கர்நாடக அரசு மேகதாதுவில் அணை கட்ட, ஏற்பாடுகள் செய்வதை கைவிட்டு, தமிழக விவசாயிகளும், கர்நாடகா விவசாயிகளும் பயன்பெறுகின்ற வகையில், ராசிமணல் பகுதியில் அணை கட்டினால், இரண்டு மாநிலமும் நீர் வசதி பெறும். அதற்கு நடவடிக்கை எடுக்க வேண்டும்.

* டாக்டர்கள், நர்சுகளுக்கு சம்பள உயர்வு வழங்க வேண்டும். ஆசிரியர்கள் மற்றும் அரசு ஊழியர்கள் கோரிக்கையை நிறைவேற்ற வேண்டும் .

* தமிழகத்தில் கனிமவள கொள்ளை, நாளுக்கு நாள் அதிகரித்து வருகிறது. தென்காசி மாவட்டத்தில் இருந்து கன்னியாகுமரி வழியாக கனரக வாகனங்களில், கேரளாவுக்கு கனிமங்கள் கடத்தப்படுகின்றன. இதை தடுக்க வேண்டும்.

* மின் கட்டண உயர்வை திரும்ப பெற வேண்டும்.

* வரும் உள்ளாட்சி தேர்தல் மற்றும் 2026 சட்டசபை தேர்தல் வருவதையொட்டி, அனைத்து சட்டசபை தொகுதிகளுக்கும் பொறுப்பாளர்களை நியமித்து, தேர்தல் பணிகளை உடனே துவக்க வேண்டும்.

இவ்வாறு தீர்மானங்கள் நிறைவேற்றப்பட்டன.