தமிழ்நாடு மாற்றுத்திறன் மாணவர்களுக்கான ஒருங்கிணைந்த கல்வித்திட்ட சிறப்பு பயிற்றுனர்கள் சங்கத்தின் தலைவர் சேதுராமன் தாக்கல் செய்த மனு:

தமிழகத்தில், 1.20 லட்சம் மாற்றுத்திறன் மாணவர்கள் கல்வி பயில்கின்றனர். இந்திய புனரமைப்பு கவுன்சில் பிறப்பித்த வழிமுறைகளின்படி, மாற்றுத்திறன் மாணவர்களுக்கு கல்வி கற்பிக்க, பள்ளிகல்வித்துறையில், 10,000 ஆசிரியர்கள் நியமிக்கப்பட வேண்டும்; ஆனால், 1,600 சிறப்பு பயிற்றுனர்களே உள்ளனர். அவர்களுக்கும் பணி உத்தரவாதம் இல்லை.

கடந்த 1998ல், எங்கள் சங்க உறுப்பினர்கள், சிறப்பு பயிற்றுனர்களாக நியமிக்கப்பட்டனர்; 22 ஆண்டுகளுக்கும் மேலாக பணி முடித்தும், சொற்ப தொகையை சம்பளமாக பெறுகின்றனர். அவர்களின் பணி வரன்முறை கோரி, அரசிடம் மனு அளித்தோம்; எந்த நடவடிக்கையும் இல்லை.

அரசின் கவனத்தை ஈர்க்க, எங்கள் சங்க உறுப்பினர்கள், திருச்சி சத்திரம் பஸ் நிலையத்தில் இருந்து, சென்னை தலைமை செயலகம் வரை, நடைபயண பேரணி நடத்த முடிவு செய்துள்ளோம். 200 பேர் கலந்து கொள்ளும் இந்தப் பேரணி, வரும் 5 முதல் 19 வரை நடத்த திட்டமிடப்பட்டு உள்ளது.

இதற்காக, போலீஸ் பாதுகாப்பும், பேரணிக்கு அனுமதியும் கோரினோம்; எந்த நடவடிக்கையும் இல்லை. எங்களுக்கு அனுமதி வழங்க, டி.ஜி.பி.,க்கு உத்தரவிட வேண்டும்.

இவ்வாறு மனுவில் கூறப்பட்டுள்ளது.

மனு, நீதிபதி நிர்மல்குமார் முன், விசாரணைக்கு வந்தது.

மனுவுக்கு பதில் அளிக்கும்படி, போலீஸ் தரப்புக்கு உத்தரவிட்டு, விசாரணையை, நீதிபதி தள்ளி வைத்துள்ளார்.