ஹிந்து முன்னணி எதிர்ப்பு

தமிழக ஹிந்து முன்னணி மாநில தலைவர் காடேஸ்வரா சுப்பிரமணியம் கூறியதாவது: சென்னை சூளை பகுதியில் அரசுக்கு சொந்தமான இடத்தில், 25 ஆண்டுகளுக்கு முன், ஹஜ் இல்லம் கட்டப்பட்டு உள்ளது. அந்த சாலை வழியாக, விநாயகர் சதுர்த்தி ஊர்வலம், சாமி ஊர்வலம் தடுக்கப்படுகிறது. தற்போது, ஹஜ் இல்லம் கட்டப்படும் இடம், பிற்படுத்தப்பட்ட சமூக மேம்பாட்டிற்காக ஒதுக்கப்பட்ட அரசு இடம். ஹிந்துக்களுக்காக ஒதுக்கப்பட்ட இடத்தை, இஸ்லாமியர்களுக்கு வாரி தருவது கண்டிக்கத்தக்கது.
ஹஜ் இல்லம் என்பது அரசின் கட்டுப்பாட்டில் இருப்பது இல்லை. இஸ்லாமிய குழுக்களின் நிர்வாகத்தில் இருக்கிறது. விமான நிலையம், தென் மாவட்டங்கள் செல்வதற்கான சாலை மார்க்கம், ரயில் தளம், உள்ளூர் ரயில், மெட்ரோ ரயில் என, பல போக்குவரத்து நிறைந்த இடத்தில், ஹஜ் இல்லம் கட்டப்பட உள்ளது. இது தவிர ராணுவ மையம், முக்கிய அலுவலகங்களும் இங்குதான் உள்ளன.
ஹஜ் இல்லம் கட்டினால், பல பிரச்னைகள் எழும். தி.மு.க.,விற்கு சிறுபான்மையினர் ஓட்டு வங்கிதான் கண்களுக்கு தெரிகிறது. நங்கநல்லுாரில் ஹஜ் இல்லம் அமைப்பதற்கு ராணுவ அமைச்சகம், தேசிய புலனாய்வு முகமை, விமான போக்குவரத்து ஆணையம், ரயில்வே மற்றும் மெட்ரோ ரயில் நிர்வாகம் ஆட்சேபனை தெரிவிக்க வேண்டும். இதை தடுத்து நிறுத்த சட்ட ரீதியான முயற்சிகளை, ஹிந்து முன்னணி முன்னெடுக்கும். இவ்வாறு அவர் கூறினார்.