சென்னை கிண்டியில், ஐ.எப்.எஸ்., எனும் நிதி நிறுவனம் செயல்பட்டு வந்தது. இந்நிறுவனத்தை, வேலுார் மாவட்டத்தைச் சேர்ந்த சகோதரர்கள் லட்சுமி நாராயணன், மோகன்பாபு, வேதநாராயணன், ஜனார்த்தனன் ஆகியோர் நடத்தி வந்தனர்.

முதலீட்டாளர்களுக்கு, 10 சதவீதம் வட்டி தருவதாக, 5,322 பேரிடம், 828 கோடி ரூபாய் மோசடி செய்துள்ளனர். இதுகுறித்து, பொருளாதார குற்றப்பிரிவு போலீசார், சகோதரர்கள் நான்கு பேர் உட்பட 21 பேர் மீது, 2022ல் வழக்குப்பதிவு செய்து, கைது நடவடிக்கையில் ஈடுபட்டு வருகின்றனர்.

வெளிநாடுகளுக்கு தப்பிய சகோதரர்கள் நான்கு பேரை தேடி வந்தனர். இந்நிலையில், வெளிநாட்டில் இருந்து சென்னை திரும்பிய, ஐ.எப்.எஸ்., மோசடி நிதி நிறுவன இயக்குநர்களில் ஒருவரான வேதநாராயணன், 48, கைது செய்யப்பட்டுள்ளார். அவரை இரண்டு நாள் காவலில் எடுத்து, பொருளாதார குற்றப்பிரிவு போலீசார் விசாரித்தனர்.