தினமலர்
சினிமா
டிவி
Podcast
iPaper
கோயில்கள்
புத்தகங்கள்
Subscription
திருக்குறள்
கடல் தாமரை
Dinamalar Logo

 

/செய்திகள்/தமிழகம்/ பா.ம.க.,வில் இருந்து ஜி.கே.மணி நீக்கம்

 பா.ம.க.,வில் இருந்து ஜி.கே.மணி நீக்கம்

 பா.ம.க.,வில் இருந்து ஜி.கே.மணி நீக்கம்


ADDED : டிச 27, 2025 07:19 AM

Follow on GoogleFavourite on Google

ADDED : டிச 27, 2025 07:19 AM


Follow on Google
Latest Tamil News
அ நிறம் | அளவு

சென்னை: பா.ம.க., கவுரவத் தலைவர் ஜி.கே.மணியை, கட்சியிலிருந்து நீக்குவதாக அக்கட்சி தலைவர் அன்புமணி அறிவித்துள்ளார்.

பா.ம.க.,வில் நிறுவனர் ராமதாஸ் - தலைவர் அன்புமணி இடையே மோதல் நீடித்து வரும் நிலையில், இருவரும் தனித்தனியாக செயல்பட்டு வருகின்றனர். தந்தையிடம் இருந்து தன்னை பிரித்தது, ஜி.கே.மணி தான் என்றும், அவர் தி.மு.க.,வின் கைக்கூலி என்றும் அன்புமணி குற்றஞ்சாட்டி வருகிறார். இந்நிலையில், மணியை கட்சியில் இருந்து அன்புமணி நீக்கியுள்ளார்.

இது தொடர்பாக, பா.ம.க., வெளியிட்டுள்ள அறிக்கை: பா.ம.க.,வைச் சேர்ந்த பென்னாகரம் தொகுதி எம்.எல்.ஏ., - ஜி.கே.மணி, கட்சி நலனுக்கும், கட்சித் தலைமைக்கும் எதிராக தொடர்ந்து செயல்பட்டு வருகிறார். அவரை, அடிப்படை உறுப்பினரில் இருந்து ஏன் நீக்கக்கூடாது என விளக்கம் கேட்டு, கட்சியின் ஒழுங்கு நடவடிக்கை குழு கடந்த 18ம் தேதி நோட்டீஸ் அனுப்பியது.

ஆனால், மணியிடம் இருந்து எந்த விளக்கமும் வரவில்லை. எனவே, அவரை கட்சியின் அடிப்படை உறுப்பினர் பொறுப்பிலிருந்து நீக்கலாம் என, பா.ம.க., தலைவர் அன்புமணிக்கு, ஒழுங்கு நடவடிக்கை குழு பரிந்துரைத்தது. அதை ஏற்று, மணியை அடிப்படை உறுப்பினரில் இருந்து அன்புமணி நீக்கியுள்ளார். அவருடன் பா.ம.க.,வினர் எந்த தொடர்பும் வைத்துக்கொள்ள வேண்டாம். இவ்வாறு அதில் கூறப்பட்டுள்ளது.

'என்னை எப்படி நீக்க முடியும்?'


அன்புமணி அறிவிப்பு குறித்து ஜி.கே.மணி அளித்த பேட்டி: பா.ம.க.,வில் கடந்த 46 ஆண்டுகளாக பயணிக்கிறேன்; 25 ஆண்டுகளாக பா.ம.க., தலைவராக இருந்த என்னை நீக்குவதாக வரும் செய்தியை பார்த்து சிரிப்பதா, அழுவதா என தெரியவில்லை. மனிதநேயம், மனித பண்பு உள்ளவர்களுக்கு இப்படிப்பட்ட சிந்தனை வராது. ராமதாஸ் தான் பா.ம.க., அடையாளம். ராமதாசால் கட்சியில் இருந்து நீக்கப்பட்டவர் அன்புமணி. இப்போது, கட்சியில் அடிப்படை உறுப்பினராகக்கூட இல்லாத அவர், என்னை எப்படி நீக்க முடியும்? அன்புமணிக்கு, பா.ம.க.,வில் எந்த அதிகாரமும் தகுதியும் இல்லை. எனவே, அவரது அறிவிப்பை ஒரு பொருட்டாகவே எடுத்துக்கொள்ள வேண்டியதில்லை. அரசியலில் அன்புமணி நிலைத்து நிற்க வேண்டும் என்றால், ராமதாஸை சந்தித்து பேச வேண்டும். இல்லையென்றால், தனிக்கட்சி துவங்கிக் கொள்ளலாம். ராமதாஸ் படத்தை எக்காரணம் கொண்டும் அன்புமணி பயன்படுத்தக்கூடாது. ராமதாசுடன் உள்ளவர்களை அவமானப்படுத்தி விட்டு கட்சி நடத்தினால், சமுதாய மக்கள் எப்படி அன்புமணிக்கு ஓட்டளிப்பர்? இவ்வாறு அவர் கூறினார்.



தினமலர் WhatsApp Channel-ல் சேருங்கள்
Latest Tamil news, instantly on WhatsApp
Follow





      Dinamalar
      Follow us