அமெரிக்க அதிபர் டிரம்பின் நடவடிக்கையால், பல நாடுகளின் பொருளாதாரம் பாதிக்கப்படும் சூழல் உருவாகி உள்ளது.

எனவே, சர்வதேச முதலீட்டாளர்கள், பாதுகாப்பு கருதி, தங்கம், வெள்ளியில் அதிக அளவில் முதலீடு செய்கின்றனர். இதனால், சர்வதேச சந்தையில் தங்கம், வெள்ளி விலைகள் உயர்ந்துள்ளன.

நம் நாட்டில் எப்போதும் இல்லாத வகையில், தங்கம், வெள்ளி விலைகள், தினமும் புதிய உச்சத்தை எட்டி வருகின்றன.

தமிழகத்தில் கடந்த சனிக்கிழமை, 22 காரட் ஆபரண தங்கம் கிராம் 14,750 ரூபாய்க்கும், சவரன் 1,18,000 ரூபாய்க்கும் விற்பனையானது. வெள்ளி கிராம், 365 ரூபாய்க்கு விற்கப்பட்டது.

கடந்த ஞாயிற்றுக்கிழமை தங்கம் சந்தைக்கு விடுமுறை. அன்று, முந்தைய நாள் விலையிலேயே ஆபரணங்கள் விற்பனையாகின. நேற்று, தங்கம் விலை கிராமுக்கு 275 உயர்ந்து, 15,025 ரூபாய்க்கு விற்கப்பட்டது.

சவரனுக்கு 2,200 அதிகரித்து, 1,20,200 ரூபாய்க்கு விற்பனையானது. வெள்ளி கிராமுக்கு 10 உயர்ந்து, 375 ரூபாய்க்கு விற்கப்பட்டது. கிலோவுக்கு 10,000 அதிகரித்து, 3.75 லட்சம் ரூபாய்க்கு விற்பனையானது.