'அலுவலர்களுக்கு தொழில்நுட்ப பயிற்சி'

வேளாண் துறை செயலர் தட்சிணாமூர்த்தி வெளியிட்டுள்ள அறிக்கை: வேளாண் விரிவாக்கம் என்பது, ஆராய்ச்சியில் கண்டுபிடிக்கப்படும் புதிய ரகங்கள், உற்பத்தி மற்றும் உற்பத்தி திறனை உயர்த்தும் தொழில்நுட்பங்கள், பூச்சி, நோய் தாக்குதலை கட்டுப்படுத்த தேவையான வழிமுறைகள், நவீன வேளாண் கருவிகள், உற்பத்தி செய்யப்படும் வேளாண் விளைபொருட்களை சந்தைப் படுத்துதல் உள்ளிட்டவற்றை உள்ளடக்கியது. விவசாயிகள் தங்கள் வருமானத்தை உயர்த்த, தற்போது வேளாண் பயிர்களுடன் தோட்டக்கலை பயிர்களையும் சாகுபடி செய்து வருகின்றனர். அவர்களுக்கு வேளாண் விரிவாக்கத் திட்டத்தின் பலன்கள் மற்றும் தொழில்நுட்ப உதவிகள் உரிய நேரத்தில் கிடைப்பதில்லை. இதுபோன்ற இடர்பாடுகளை நிவர்த்தி செய்வதற்கு, 'உழவர் அலுவலர் தொடர்பு திட்டம் 2.0' செயல்படுத்தப்பட உள்ளது. இதன்படி, இதுநாள் வரை ஆறு முதல் எட்டு கிராமங்களுக்கு சென்று வந்த வேளாண் துறை களப்பணி அலுவலர்கள் தற்போது நான்கு கிராமங்களுக்கு மட்டும் சென்றால் போதும். களப்பணி அலுவலர் அதிகபட்சமாக 2,922 ஏக்கர் சாகுபடி பரப்பை பார்வையிட்டு, களப்பணி ஆற்றினால் போதும். ஒரு வாரத்தில் நான்கு நாட்கள் கிராமங் களுக்கு சென்று, விவசாயிகளை சந்திக்க வேண்டும். ஐந்தாவது நாள் தலைமையிடத்தில் வட்டார அலுவலரை சந்தித்து, திட்ட முன்னேற்றம், களப் பிரச்னைகள், அதற்கான தீர்வுகள் குறித்து ஆலோசிக்க வேண்டும். களப்பணி அலுவலர்களுக்கு வேளாண்மை, தோட்டக்கலை பயிர்கள் குறித்து அனைத்து விதமான பயிற்சிகள் அளித்து, தொழில்நுட்ப திறன் விரிவாக மேம்படுத்தப்பட உள்ளது. இதனால், தோட்டக்கலை பயிர்களுக்கு பின்னடைவு ஏற்படும் என்ற கருத்து முற்றிலும் உண்மைக்கு புறம்பானது. தோட்டக்கலை மாணவர்களின் வாய்ப்புகள் பறிபோகும்; தோட்டக்கலை பெரிய அளவில் பாதிக்கப்படும் என்பது தவறு. இதை உணராமல், தோட்டக்கலை களப்பணி அலுவலர்களில் ஒரு சிலர், தங்களது சுய லாபத்திற்காக அனைவரையும் போராட துாண்டி விடுகின்றனர். விவசாயிகளிடம் நேரடியாக சென்று பழகி, வேளாண்மை சார்ந்த அனைத்து திட்டங்களையும் கொண்டு சேர்த்து, அவர்களின் வாழ்வாதாரத்தை மேம்படுத்த விருப்பமில்லை. இது முறையற்ற செயலாக தெரிகிறது. இவ்வாறு தட்சிணாமூர்த்தி கூறியுள்ளார்.