நாட்டின் மிக முக்கிய ஆன்மிக தலங்களில் ஒன்றான ராமேஸ்வரத்துக்கு தினமும் பல்லாயிரக்கணக்கான பக்தர்கள் வந்து செல்கின்றனர். இங்கு வரும் பக்தர்கள், கடலில் நீராடுவது வழக்கம்.

இவ்வாறு நீராடும் பக்தர்கள், அருகேயுள்ள தனியார் உடை மாற்றும் கூடங்களில் சென்று உடை மாற்றிக்கொண்டு கோவிலுக்கு செல்கின்றனர். இத்தகைய தனியார் உடை மாற்றும் கூடங்களில் ரகசிய கேமரா பொருத்தப்பட்டிருப்பதை அங்கு உடை மாற்றச் சென்ற பெண் ஒருவர் கண்டுபிடித்தார்.

அவர் போலீசில் புகார் அளித்ததை தொடர்ந்து, சம்பந்தப்பட்ட உடை மாற்றும் கூடத்தை நடத்திய மீரான் மைதீன், ராஜேஷ் கண்ணன் இருவரும் கைது செய்யப்பட்டனர்.

இந்த சம்பவம், பக்தர்கள் மத்தியில் பெரும் அதிர்ச்சியை ஏற்படுத்தியது. போலீசார் உடனடியாக, அனைத்து உடை மாற்றும் கூடங்களிலும் அதிரடி சோதனை நடத்தினர்.

தொடர்ந்து, விடுதிகள், தனியார் கட்டண குளியலறைகளுக்கு பல்வேறு விதிமுறைகள் அமல் செய்யப்பட்டன.

இந்நிலையில், உடை மாற்றும் அறையில் ரகசிய கேமரா பொருத்திய விவகாரத்தில் கைது செய்யப்பட்ட ராஜேஷ் கண்ணன், மீரான் மைதீன் இருவரையும் குண்டர் சட்டத்தில் கைது செய்ய ராமநாதபுரம் மாவட்ட கலெக்டர் உத்தரவிட்டுள்ளார்.மாவட்ட எஸ்.பி., பரிந்துரை அடிப்படையில் இந்த உத்தரவை கலெக்டர் பிறப்பித்துள்ளார்.