தமிழகத்தில், பல்வேறு மாவட்டங்களில் வீட்டுவசதி வாரியம் சார்பில் குடியிருப்பு திட்டங்கள் செயல்படுத்தப்படுகின்றன. இத்திட்டங்களில், 10,000 வீடுகள், மனைகள், விற்பனையாகாமல் உள்ளன. இதில் குடியிருப்பு, வணிக மனைகளை விற்க, வீட்டுவசதி வாரியம் தொடர்ந்து அறிவிப்பு வெளியிட்டு வருகிறது. எனினும், பொது மக்களும், தனியார் நிறுவனங்களும், இதில் பங்கேற்க ஆர்வம் காட்டவில்லை.

பெரும்பாலான திட்ட பகுதிகளில், காலி மனைகளில் கருவேல மரங்கள் வளர்ந்து, காடாக காட்சி அளிக்கின்றன. குறிப்பாக, எந்த மனையின் எல்லை, எது என்பது புரியாமல், மக்களும், அதிகாரிகளும், குழப்பம் அடையும் நிலை ஏற்பட்டுள்ளது. இதை கருத்தில் வைத்து, மனைப்பிரிவுகளை சீரமைக்க, வீட்டுவசதி வாரியம் முடிவு செய்துள்ளது.

இதற்காக, முதல் கட்டமாக, காஞ்சிபுரம், வேலுார் திட்ட பகுதிகளில், குடியிருப்பு, வணிக மனைகள் அமைந்துள்ள பகுதிகளை, சீரமைக்கும் நடவடிக்கைகள் துவங்கி உள்ளன. மனைகளில் வளர்ந்துள்ள கருவேல மரங்களை வெட்டி அகற்றி, மனைகளில் எல்லை கல் பதிக்க, வாரிய அதிகாரிகள் 'டெண்டர்' கோரியுள்ளனர்.