சினிமாவிற்கு முழுக்கு போட்டு, தேர்தல் பிரசாரப் பணிகளை செப்டம்பர் மாதம் திருச்சியில் விஜய் துவக்கினார். அரியலுார், பெரம்பலுார், திருவாரூர், நாகப்பட்டினம் மாவட்டங்களில் பிரசாரப் பேருந்தில் சுற்றுப்பயணம் செய்தார்.

வழக்குப்பதிவு

அதே மாதம் 27ம் தேதி நாமக்கல்லில் பிரசாரத்தை முடித்துவிட்டு, கரூர் பிரசாரத்தில் பங்கேற்றார். அங்கு ஏற்பட்ட கூட்ட நெரிசலில், 41 பேர் பலியாகினர். இந்த சம்பவம் தொடர்பாக, த.வெ.க., மாவட்டச் செயலர், மாநில நிர்வாகிகள் மீது வழக்குப்பதிவு செய்யப்பட்டது.

விஜய் மீது எந்த வழக்கும் பதிவாகாத நிலையில், அவர் வீட்டிலேயே முடங்கினார். இதனால், த.வெ.க., செயல்பாடுகள் ஒரு மாதமாக தடைபட்டன.

இந்த சந்தர்ப்பத்தை பயன்படுத்தி, அக்கட்சியை கூட்டணிக்கு இழுக்கும் வேலைகளை அ.தி.மு.க., தலைமை துவக்கியது. அக்கட்சியின் பொதுச்செயலர் பழனிசாமி பங்கேற்ற பிரசாரக் கூட்டத்தில், த.வெ.க., கொடிகளுடன் அக்கட்சித் தொண்டர்கள் தலை காட்டினர்.

அப்போது பேசிய பழனிசாமி, 'கொடி பறக்கிறது பாருங்க... கூட்டணிக்கு பிள்ளையார் சுழி போடப்பட்டு விட்டது' என கூறி தொண்டர்களை உற்சாகப்படுத்தினார்.

அ.தி.மு.க., முன்னாள் அமைச்சர்களும், 'அ.தி.மு.க., கூட்டணிக்கு த.வெ.க., வந்தால் நல்லது; தி.மு.க., மீண்டும் ஆட்சிக்கு வந்தால், த.வெ.க.,வை விடமாட்டார்கள்' என கருத்து தெரிவித்தனர். இரு தரப்பிலும் கூட்டணி பேச்சு நடப்பதாக தகவல் வெளியானது.

அ.தி.மு.க., தொண்டர்கள் மட்டுமின்றி, நிர்வாகிகளும், த.வெ.க., தங்கள் கூட்டணிக்கு வரும்; தேர்தலில் எளிதாக வெற்றி பெற்று விடலாம் என நம் பிக்கையோடு காத்திருந்தனர்.

இந்நிலையில், வரும் சட்டசபை தேர்தலில், 'நான் தான் முதல்வர் வேட்பாளர்' என, த.வெ.க., தலைவர் விஜய் அறிவித்துள்ளார்.

முழு அதிகாரம்

அக்கட்சி சிறப்பு பொதுக்குழு கூட்டம், செங்கல்பட்டு மாவட்டம், மாமல்லபுரத்தில் உள்ள தனியார் விடுதியில் நேற்று நடந்தது. இக்கூட்டத்தில், 12 தீர்மானங்கள் நிறைவேற்றப்பட்டன.

அதில், கடைசி தீர்மானமாக, 'முதல்வர் வேட்பாளர் விஜய் தலைமையில், 2026 சட்டசபை தேர்தலை சந்திக்க வேண்டும். கூட்டணி தொடர்பாக முடிவெடுக்கும் முழு அதிகாரமும் விஜய்க்கு வழங்கப்பட்டுள்ளது' என்ற தீர்மானம் நிறைவேற்றப்பட்டது.

கூட்டத்தில் பேசிய அக்கட்சி பொதுச்செயலர் ஆனந்த், ''மக்கள் எதிர்பார்க்கும் மாற்றத்தை கொடுக்கும் தகுதி கொண்ட ஒரே கட்சி த.வெ.க., மட்டும் தான். வரும் சட்டசபை தேர்தலில் விஜயை முதல்வராக அமர வைக்க, த.வெ.க.,வினர் சபதம் எடுத்துக்கொள்ள வேண்டும்,'' என்றார்.

விஜய் முதல்வர் வேட்பாளர் என்பதை அ.தி.மு.க., ஏற்காது. எனவே, த.வெ.க.,வுடன் கூட்டணி என்ற அ.தி.மு.க.,வினரின் கனவு சிதைந்துள்ளது.

தனித்தன்மைக்காக பேசியிருக்கலாம் புதிதாக கட்சி ஆரம்பிக்கும்போது, தங்கள் கட்சிக்கென தனித்தன்மை வேண்டும் என்று தான் அனைவரும் நினைப்பர். அதன்படி விஜய் பேசியிருக்கலாம். முதல்வர் வேட்பாளர் விஜய் என்பது அவர்கள் கருத்து. யார் முதல்வர் என்பதை மக்கள் தான் தீர்மானிக்க வேண்டும். ஜெயகுமார், அமைப்பு செயலர், அ.தி.மு.க.,

- நமது நிருபர் -