ஷங்கர், மணிரத்னம் ஆகியோருடன் நீண்ட இடைவெளிக்குப் பிறகு கூட்டணி அமைத்திருந்தார் கமல்ஹாசன். 1996ல் வெளிவந்த 'இந்தியன்' படத்திற்குப் பிறகு 28 ஆண்டு இடைவெளியில் ஷங்கருடனும், 1987ல் வெளிவந்த 'நாயகன்' படத்திற்குப் பிறகு 37 ஆண்டு இடைவெளியில் மணிரத்னத்துடனும் இணைந்த படங்கள் இப்படியொரு தோல்வியைத் தரும் என்று யாருமே எதிர்பார்க்கவில்லை. இதனால், ஷங்கர், மணிரத்னம், கமல்ஹாசன் ஆகியோரது அடுத்த படங்கள் குறித்து பல கேள்விகள் எழுந்துள்ளன.

'இந்தியன் 2' வெளியீட்டிற்கு முன்னதாகவே 'இந்தியன் 3' குறித்த செய்திகள் வந்தன. பட வெளியீட்டிற்குப் பின்னர் 'இந்தியன் 3' குறித்து இதுவரையிலும் எந்த ஒரு அறிவிப்பும் வெளியாகவில்லை. இன்னும் சில காட்சிகளை படமாக்க வேண்டிய உள்ளது என்று மட்டும் தகவல் வெளியாகி இருந்தது.

இப்போதுள்ள சூழ்நிலையில் 'இந்தியன் 3' படம் மீண்டும் ஆரம்பமாகுமா, அதை முடித்து வெளியிட சம்பந்தப்பட்டவர்கள் ஆர்வம் காட்டுவார்களா என்பது தெரியவில்லை. 'தக் லைப்' படத்தின் தோல்விக்குப் பிறகு அந்த ஆர்வம் நீடித்திருக்குமா என்பதும் புரியாத புதிர் தான்.

கமல்ஹாசனுக்கு அடுத்து ஒரு பிரம்மாண்ட வெற்றி தேவைப்படுகிறது. அந்த வெற்றிக்குப் பிறகு 'இந்தியன் 3' வருவதுதான் உகந்ததாக இருக்கும் என கோலிவுட்டில் நினைக்கிறார்கள்.

அதேப்போல் ஷங்கரும் அவரது அடுத்த கனவுப் படைப்பான 'வேள்பாரி' மூலம் மீண்டு வந்து பின்னர் 'இந்தியன் 3' படத்தை எடுக்கலாம் என கோலிவுட்டில் பேசுகிறார்கள்.