அவரது அறிக்கை:

பொதுவாக, ஒரு ஆட்சிக்கான அடையாளமாக, அந்த ஆட்சியில் நிறைவேற்றப்பட்ட மக்கள் நலத் திட்டங்களே திகழும். ஆனால், தி.மு.க., ஆட்சியோ, சட்டம்-ஒழுங்கு சீர்கேடு, பறிபோன பெண்கள் பாதுகாப்பு, போதைப்பொருள் புழக்கம், எங்கும் எதிலும் ஊழல் என, குறைகள் மட்டுமே இருக்கும் ஒரு அவல ஆட்சியாக இருக்கிறது.

இதை முதல்வர் ஸ்டாலின் நன்கு உணர்ந்தே இருக்கிறார். அதனால்தான், கடந்த ஒரு மாதமாக இவைகளை திசைத்திருப்ப வரிசையாக நாடகங்களை அரங்கேற்றி வருகிறார். நடிகர் கவுண்டமணி, ஒரு நகைச்சுவையில், இலையில் செங்கலை வைத்துவிட்டு, 'சோத்துல கல்லு இருக்கு' என்பார். முதல்வர் ஸ்டாலின் கொண்டு வரும் தீர்மானங்கள், அதுபோலத் தான் இருக்கின்றன.

இவ்வளவு தீர்மானங்களை வரிசை கட்டிக்கொண்டு வருபவர், தமிழகத்தின் ஜீவாதாரப் பிரச்னையான காவிரி நதிநீர் உரிமை குறித்து, ஒரு தீர்மானம் கூட கொண்டு வரவில்லையே ஏன்? எஜமான விசுவாசம் தடுக்கிறதா ஸ்டாலின்?

கர்நாடக காங்கிரஸ் முதல்வர், துணை முதல்வருடன், பல கூட்டங்களில் கொஞ்சிக் குலாவிக் கொண்டிருக்கும் நீங்கள், ஒரு முறையாவது காவிரி குறித்து பேசியதுண்டா? 'மேகதாது அணை தமிழகத்திற்கு நன்மை தரும்' என்று, தமிழகத்திலேயே கர்நாடக துணை முதல்வரை பேசவிட்டு, வேடிக்கை பார்த்த கொத்தடிமைகள் தானே நீங்கள்?

கேரள கம்யூனிஸ்ட் முதல்வருடன் பல மேடைகளைப் பகிர்ந்து, கைகுலுக்கிக் கொண்டிருக்கும் நீங்கள், ஒரு முறையாவது முல்லைப் பெரியாறு அணையில், தமிழகத்தின் மாநில உரிமை குறித்து கோரிக்கை வைத்தது உண்டா?

கடந்த 2009 -- 2014 ஐக்கிய முற்போக்கு கூட்டணி ஆட்சியில், முதுகைக் காட்டினால் கூட கையெழுத்து போடும் அளவிற்கு காங்கிரசுக்கு அடிமை சாசனம் எழுதி கொடுத்துவிட்டு, மத்திய அரசில் பதவி சுகத்தை அனுபவித்த எஜமான விசுவாசிகள் நீங்கள் தானே?

காங்கிரஸ் கூட்டணி ஆட்சியில், 'நீட்' என்ற தேர்வை அறிமுகம் செய்தவரே, தி.மு.க.,வைச் சேர்ந்த அன்றைய மத்திய இணை அமைச்சர் காந்திசெல்வன் தானே?

இப்படிப்பட்ட வரலாறு கொண்ட உங்களுக்கு, அ.தி.மு.க., பற்றி பேச என்ன அருகதை இருக்கிறது?

முதல்வர் ஸ்டாலினுக்கு நேரடியாக சவால் விடுகிறேன். மேகதாது அணை, காவிரி நதிநீர் விவகாரங்களில், தமிழகத்திற்கு எதிராக செயல்படும் கர்நாடக காங்கிரஸ் அரசைக் கண்டித்தும், முல்லைப் பெரியாறு அணையில் தமிழகத்தின் உரிமைகளை மதிக்காமல் செயல்படும் கேரள கம்யூனிஸ்ட் அரசைக் கண்டித்தும், அரசினர் தனித் தீர்மானத்தை, முடிந்தால் சட்டசபையில் கொண்டு வாருங்கள் பார்ப்போம்.

இவ்வாறு அவர் கூறியுள்ளார்.