தேசிய நெடுஞ்சாலை ஆணையம், தேசிய, மாநில நெடுஞ்சாலை துறை மூலம் ரோடு விரிவாக்கம், பைபாஸ் ரோடு, தேசிய நெடுஞ்சாலை அமைக்கும் பணி நடைபெற்று வருகிறது.

சிவகங்கை வழியாக மதுரை- ராமேஸ்வரம் (என்.எச்.,49) தேசிய நெடுஞ்சாலைக்கென மானாமதுரையிலும், திருச்சி-- ராமநாதபுரம் (என்.எச்.,210) ரோட்டிற்காக தேவகோட்டையிலும், மேலுார் - திருப்புத்துார் வரை (என்.எச்.338) மற்றும் கொட்டாம்பட்டி முதல் காரைக்குடி வரையிலான (என்.எச்.,383) ரோடு பணிகளுக்கான திருப்புத்துாரில் 3 அலுவலகங்களும், மானாமதுரை -- தஞ்சாவூர் ரோடுக்கு (என்.எச்.,.226) சிவகங்கையிலும் நில எடுப்புக்கு என 6 தனி தாசில்தார் அலுவலகங்கள் உள்ளன.

ஒரு அலுவலகத்தில் வருவாய் ஆய்வாளர், சர்வேயர், கம்ப்யூட்டர் ஆப்பரேட்டர் என 7 முதல் 10 பேர் வரை பணிபுரிந்தனர்.

இந்நிலையில் 6 இடங்களில் இருந்த அலுவலகங்களை திருப்புத்துாரில் 2, மானாமதுரை ஆகிய அலுவலகங்களுடன் இணைத்து விட்டு மற்ற 3 அலுவலகங்களை நேற்றுடன் கலைத்து விடுமாறு உத்தரவிடப்பட்டுள்ளது. மேலும் திருப்புத்துார், மானாமதுரையில் வாடகை கட்டடத்தில் இயங்கி வரும் அலுவலகங்களை கலெக்டர் அலுவலக வளாகத்திற்கு மாற்றிவிடுமாறும் தெரிவித்துள்ளது.இது போன்ற நடைமுறையை அனைத்து மாவட்டங்களிலும் பின்பற்ற நில நிர்வாக ஆணையர் பழனிச்சாமி உத்தரவிட்டுள்ளார்.

எதிர்ப்பு:

தமிழ்நாடு வருவாய் துறை அலுவலர் சங்க மாநில செயலாளர் தமிழரசன் கூறியதாவது:

சிவகங்கைக்கென நில எடுப்பு தாசில்தார் பணியிடம் இன்றி துாத்துக்குடி, புதுக்கோட்டையுடன் இணைத்து விட்டனர். அலுவலகங்களை ஒருங்கிணைக்கும்போது நிலத்திற்கான இழப்பீடு பெறுவதில் மக்களுக்கு சிரமம் ஏற்படும்.

எனவே நில எடுப்பு தனி தாசில்தார் அலுவலகத்தை 5 ஆக சிவகங்கையில் உயர்த்த வேண்டும் என கலெக்டர் ஆஷா அஜித் மூலம் அரசுக்கு கோரிக்கை வைத்துள்ளோம் என்றார்.