மக்களின் உணர்வுக்கு மதிப்பு

டில்லி முதல்வர் ரேகா குப்தா சமூக வலைத்தளத்தில் வெளியிட்டுள்ள பதிவு: மக்களின் உணர்வுகளுக்கு மதிப்பளித்து, தீபாவளிக்கு பசுமைப் பட்டாசு வெடிக்க உச்ச நீதிமன்றம் நடுநிலையுடன் தீர்ப்பளித்துள்ளது. அரசின் வேண்டுகோளை ஏற்றுக்கொண்ட உச்ச நீதிமன்றத்துக்கு நன்றி தெரிவித்துக் கொள்கிறேன். பொதுமக்களின் உணர்வுகளை மதிக்கும் டில்லி அரசு சுத்தமான காற்று மற்றும் பசுமையாக டில்லி மாநகரைப் பராமரிப்பதே டில்லி அரசின் நோக்கம். அதேநேரத்தில் பண்டிகைகளை மக்கள் மகிழ்ச்சியுடன் கொண்டாட வேண்டும் என்பதிலும் உறுதியாக இருக்கிறோம். இவ்வாறு அவர் கூறியுள்ளார். அமைச்சர் கபில் மிஸ்ரா வெளியிட்டுள்ள பதிவில், “ஆறு ஆண்டுகளுக்குப் பின், டில்லி மக்கள் தீபாவளி பண்டிகையை பாரம்பரிய முறைப்படி பட்டாசு வெடித்துக் கொண்டாடுவர். உச்ச நீதிமன்ற தீர்ப்பு வரவேற்கத்தக்கது. மக்களின் குரலை நீதிமன்றத்தில் சமர்ப்பித்து வெற்றி கண்ட முதல்வர் ரேகா குப்தாவுக்கு நன்றி தெரிவித்துக் கொள்கிறேன்,”என, கூறியுள்ளார்.

கலெக்டரிடம் உரிமம்

டில்லி சுற்றுச்சூழல் துறை அமைச்சர் மஞ்ஜிந்தர் சிங் சிர்சா கூறியதாவது: டில்லி மற்றும் தேசிய தலைநகர் பிராந்தியத்தில் பசுமைப் பட்டாசு விற்பனை செய்யும் இடங்களை மாவட்ட கலெக்டர்கள் தேர்வு செய்வர். விற்பனையாளர்கள் கலெக்டரிடம் விண்ணப்பித்து உரிமம் பெற வேண்டும். உரிமம் பெற்றவர்கள் பசுமைப் பட்டாசு வகைகளை மட்டுமே விற்க வேண்டும். தடை செய்யப்பட்ட பட்டாசு விற்றால் அவற்றை பறிமுதல் செய்வதுடன் உரிமம் ரத்து செய்யப்பட்டு கடும் நடவடிக்கை எடுக்கப்படும். பசுமைப் பட்டாசு உற்பத்தியாளர்கள் மற்றும் சில்லறை விற்பனையாளர்கள் உச்ச நீதிமன்ற வழிகாட்டுதல்களை பின்பற்ற வேண்டும். மத்திய மாசு கட்டுப்பாட்டு வாரியத்துடன் இணைந்து டில்லி மாசு கட்டுப்பாட்டு குழு தீவிரமாக கண்காணித்து வருகிறது. மாநகரப் போலீசாரும் அதிரடி சோதனை நடத்தி தடை செய்யப்பட்ட பட்டாசுகளை பறிமுதல் செய்து வருகின்றனர். இந்தக் கண்காணிப்பு வரும் 25ம் தேதி வரை தொடரும். பசுமை பட்டாசுக வெடிக்க விதிக்கப்பட்டு இருந்த தடையை நீக்க முயற்சி எடுத்த முதல்வர் ரேகா குப்தாவுக்கு நன்றி தெரிவித்துக் கொள்கிறேன். இவ்வாறு அவர் கூறினார்.

ஆர்வலர்கள் அச்சம்

சுற்றுச்சூழல் ஆர்வலர் அமித் குப்தா கூறுகையில், “பட்டாசு விவகாரத்தில் மக்களின் உரிமையை மதித்து உச்ச நீதிமன்றம் தீர்ப்பு அளித்துள்ளது. ஆனால், காற்று மாசுபாட்டை ஆண்டு முழுதும் எதிர்கொள்ளும் தேசிய தலைநகர் பிராந்தியத்தில் இந்த ஆண்டு மேலும் அதிகரிக்கும். காற்று தர மேலாண்மை ஆணையம், 35 சதவீத பணியாளர் பற்றாக்குறையுடன் செயல்படுகிறது. மாசுபாட்டுக்கு எதிரான நடவடிக்கைகள் பலவீனமாகத்தான் இருக்கிறது,” என்றார்.
மத்திய மாசு கட்டுப்பாட்டு வாரிய முன்னாள் கூடுதல் இயக்குனரும், விமான ஆய்வக தலைவருமான தீபங்கர் சஹா கூறியதாவது: உச்ச நீதிமன்றம் பகுத்தறிவுடன் தீர்ப்பளித்துள்ளது. பண்டிகை கொண்டாட்டத்துக்கு பசுமைப் பட்டாசு சிறந்த மாற்றாக இருக்கும். ஆனாலும், சான்றளிக்கப்பட்ட பசுமைப் பட்டாசுகள் மட்டுமே விற்கப்படுவதை உறுதி செய்ய அரசு தீவிரமாக கண்காணிக்க வேண்டும். பொதுமக்களும் விழிப்புணர்வுடன் அவற்றை மட்டுமே வாங்க வேண்டும். உச்ச நீதிமன்றம் வகுத்துள்ள நேரத்தில் மட்டுமே பட்டாசு வெடிக்க வேண்டும்.
தற்போது, வானிலை சாதகமாக இருந்தாலும் நீதிமன்ற தீர்ப்பை அமலாக்குவதில் மிகுந்த கவனத்துடன் இருக்க வேண்டும். இவ்வாறு அவர் கூறினார். சுற்றுச்சூழல் ஆர்வலர் சுனில் தஹியா கூறியதாவது: உச்ச நீதிமன்றத்தின் இந்த முடிவு எதிர்பாராத விளைவுகளுக்கு வழிவகுக்கும். பசுமைப் பட்டாசு உற்பத்தி செய்யவும், வெடிக்கவும் அனுமதிப்பது, காற்று மாசுபாட்டை சட்டப்பூர்வமாக அதிகரிப்பது போன்றதாகி விடும். பசுமைப் பட்டாசுகள் 30 சதவீதம் குறைவான மாசுபாட்டை வெளியிடும் என்றாலும், தீபாவளியின் போது பயன்படுத்தப்படும் அதிக அளவிலான பட்டாசுகளால் மாசு பல மடங்கு அதிகரிக்கும். ஆனால், தீபாவளிப் பண்டிகை அக்டோபர் மத்தியிலேயே வந்து விட்டதால், ஓரளவு நிம்மதி. இதுவே, நவம்பர் மாதம் என்றால் கடுமையான பின்விளைவுகள் ஏற்படும். இவ்வாறு அவர் கூறினார்.

சனாதனத்துக்கு வெற்றி

டில்லி பா.ஜ., தலைவர் வீரேந்திர சச்தேவா கூறுகையில், “டில்லியில் பட்டாசை தடை செய்ய நீதிமன்றத்தில் முந்தைய ஆம் ஆத்மி அரசு வாதங்களை முன்வைத்ததை நீண்ட காலமாக நாங்கள் கூறி வந்தோம். டில்லி மக்கள் இப்போது தான் சரியான அரசை தேர்ந்தெடுத்துள்ளனர். காற்று மாசுக்கு பல காரணங்கள் உள்ளன. மாசை கட்டுப்படுத்த பா.ஜ., அரசு பல நடவடிக்கைள் எடுத்து வருகிறது. பட்டாசு விவகாரத்தில், உச்ச நீதிமன்றத்தின் தீர்ப்பு சனாதனவாதிகளுக்கு கிடைத்த வெற்றி,”என்றார்.

நேர்மையான பரிந்துரை

வடகிழக்கு லோக்சபா தொகுதி பா.ஜ., - எம்.பி., மனோஜ்குமார் திவாரி கூறுகையில், “டில்லி அரசின் நேர்மறையான பரிந்துரை காரணமாக இந்த உத்தரவு சாத்தியமானது. முந்தைய ஆம் ஆத்மி அரசு நீதிமன்றத்தில் எதிர்மறையான பரிந்துரைகளை வழங்கியது. மேலும், பசுமைப் பட்டாசுகளையும் தடை செய்யவே ஆம் ஆத்மி அரசு விரும்பியது. சனாதன தர்மம் மற்றும் அதன் பண்டிகைகள் மீதான ஆம் ஆத்மி கட்சியின் நோக்கங்கள் நேர்மையற்றவை,”என்றார்.

மக்களின் கருத்து

பொதுப்பணித் துறை அமைச்சர் பர்வேஷ் சாஹிப் சிங் வர்மா கூறுகையில், “அரசு மாறிய பிறகே ஹிந்து பண்டிகை கொண்டாட்டத்துக்கு விதிக்கப்பட்டு இருந்த தடை நீங்கியுள்ளது. தீபாவளியைக் கொண்டாடும் உரிமையைப் பாதுகாக்க முந்தைய ஆம் ஆத்மி அரசு நீதிமன்றத்துக்குச் செல்லவில்லை. ஆனால் நாங்கள், மக்களின் கருத்துக்களை நீதிமன்றத்தில் முன்வைத்தோம். எனவேதான், தீபாவளியை பாரம்பரிய முறையில் பச்சை பட்டாசுகளுடன் கொண்டாட உத்தரவு கிடைத்துள்ளது,”என்றார்.

அரசை நம்புகிறேன்

ஆம் ஆத்மி தலைவரும், டில்லி முன்னாள் சுற்றுச்சூழல் துறை அமைச்சருமான கோபால் ராய் கூறுகையில், காற்றின் தரத்தை மேம்படுத்த பா.ஜ., அரசு தொடர்ந்து பாடுபடும் என நம்புகிறேன். மாசுபாட்டைக் குறைக்க நாங்கள் எங்களால் முடிந்த அனைத்து நடவடிக்கைகளும் எடுத்தோம். தீபாவளியின் போது பசுமை பட்டாசுகளை அனுமதிப்பது குறித்த உச்ச நீதிமன்றத்தின் தீர்ப்பின் மூலம், டில்லி அரசு விதிமுறைகளைப் பின்பற்றி, பண்டிகையின் போது காற்றின் தரத்தை மேம்படுத்த நடவடிக்கை எடுக்க வேண்டும்,”என்றார்.