ஜப்பானின், 'ஜெய்க்கா' பன்னாட்டு கூட்டுறவு முகமை நிறுவனத்துடன், 2021 மார்ச்சில் கடன் ஒப்பந்தம் கையெழுத்தானது. மொத்த தொகையில், 82 சதவீதம் ஜெய்க்கா நிறுவனம் கடனாக தருவதாகவும், மீதி, 18 சதவீதத் தொகையை மத்திய அரசு வழங்குவதாகவும் அறிவிக்கப்பட்டது.

டெண்டர் அறிவிப்பு

ஜெய்க்கா நிறுவனத்திடமிருந்து கடன் தொகை பெற்று, 33 மாதங்களில் கட்டுமான பணிகளை முடிக்க வேண்டும் என குறிப்பிடப்பட்டது. 2023 ஆக., 17ல் கட்டுமானத்திற்கான 'டெண்டர்' அறிவிப்பை, மதுரை எய்ம்ஸ் நிர்வாகம் வெளியிட்டது. ஜன., 29ல் சுற்றுச்சூழல் அனுமதி கோரி தமிழ்நாடு சுற்றுச்சூழல் தாக்க மதிப்பீட்டு ஆணையத்திற்கு, மருத்துவமனை நிர்வாகம் விண்ணப்பம் அனுப்பியது.

வசதிகள்

கீழ்த்தளம், தரைத்தளம் மற்றும் ஏழு தளங்கள், 870 படுக்கை வசதிகளுடன் அவசர சிகிச்சை பிரிவு, தொற்று நோய் பிரிவு ஆகியவற்றை உள்ளடக்கியதாக கட்டடம் அமைக்கப்படும். மேலும், நான்கு தளங்கள், 50 படுக்கைகளுடன் ஆயுஷ் மருத்துவ பிரிவும் அமைகிறது. பிரமாண்ட அரங்கம், இளநிலை, முதுநிலை மாணவர்களுக்கு தனி விடுதி, நுாலகம் உட்பட மொத்தம், 2 லட்சத்து 851 சதுரடியில் பல வசதிகளுடன் எய்ம்ஸ் வளாகம் அமைய உள்ளது.

மத்திய சுகாதாரத்துறையின் ஒப்புதலுக்கு பின், சென்னையை தலைமையிடமாகக் கொண்ட எல் அண்டு டி நிறுவனத்திற்கு டெண்டர் வழங்கப்பட்டுள்ளது. இதையடுத்து அந்நிறுவனத்தினர், வாஸ்து பூஜை செய்து கட்டுமான பணிகளை துவக்கினர். மதுரை எய்ம்ஸ் மருத்துவமனையில் மூன்று ஆண்டுகளாக இளநிலை மருத்துவ சேர்க்கைக்கு அனுமதிக்கப்பட்ட, 150 மாணவர்கள், தற்போது ராமநாதபுரம் மருத்துவக் கல்லுாரியில் படிக்கின்றனர். அவர்களுக்கு மதுரையிலேயே வகுப்புகள், நடத்த வாடகை கட்டடம் பார்க்கும் பணி நடந்து வருகிறது. மருத்துவ பயிற்சி, திருமங்கலம் அரசு மருத்துவமனையில் அளிக்கப்பட உள்ளது.