வரும் 2024 - 25ம் நிதியாண்டில், ஒரு லட்சம் புதிய வீடுகள், ஒவ்வொன்றும், 3.50 லட்சம் ரூபாய் செலவில் கட்டப்படும். இப்புதிய திட்டம், 'கலைஞரின் கனவு இல்லம்' என்ற பெயரில், வரும் நிதியாண்டில், 3,500 கோடி ரூபாயில் செயல்படுத்தப்படும் என, பட்ஜெட்டில் அறிவிக்கப்பட்டது. அதன்படி, வரும் நிதியாண்டில், ஒரு லட்சம் புதிய வீடுகளை, 3,100 கோடி ரூபாயில் கட்ட தமிழக அரசு நிர்வாக அனுமதி வழங்கி உள்ளது. நிர்வாக செலவுக்கு, 5 கோடி ரூபாய் ஒதுக்கி உள்ளது. தேசிய ஊரக வேலை உறுதி திட்டம் மற்றும் துாய்மை பாரதம் இயக்க திட்டத்தை இணைத்து செயல்படுத்த அரசு அனுமதி அளித்துள்ளது.

சட்டசபையில் பிப்., 15ம் தேதி, முதல்வர் பேசுகையில், 'தமிழகத்தில் 2001ம் ஆண்டுக்கு முன்பாக, பல்வேறு அரசு திட்டங்களின் கீழ், 2.50 லட்சம் வீடுகள் கட்டப்பட்டன. கிராமப்புற விளிம்பு நிலை மக்களுக்காக கட்டப்பட்ட அந்த வீடுகள், 2,000 கோடி ரூபாயில், அடுத்த இரண்டு ஆண்டுகளில் பழுது பார்த்து புனரமைக்கப்படும்' என்று அறிவித்தார். அதன்படி, 2.57 லட்சம் வீடுகளை, 1954.20 கோடி ரூபாயில் புனரமைக்க, தமிழக அரசு நிர்வாக அனுமதி அளித்துள்ளது. வரும் நிதியாண்டில் 1,48,634 வீடுகளை, 1041.32 கோடி ரூபாயில் புனரமைக்கவும், தமிழக அரசு அனுமதி அளித்துள்ளது. இது, ஏப்.,1 முதல் செயல்பாட்டிற்கு வரும்.