சசிகலா சிறைக்கு சென்றதும், தினகரன், கட்சி அலுவலகம் வந்து சென்றார். ஆட்கள் அழைத்து வருவதும் குறைக்கப்பட்டது. இதனால், கட்சி அலுவலகம் வெறிச்சோடியே காணப்பட்டது. நேற்று, அ.தி.மு.க., அணிகள் இணைப்பு நிகழ்ச்சி, கட்சி அலுவலகத்தில் நடைபெறும் தகவல் அறிந்து, கட்சி நிர்வாகிகள் மற்றும் தொண்டர்கள், கட்சி அலுவலகம் வந்தனர்.

இரு அணிகள் இணைவதை ஒட்டி, பூசணிக்காய் உடைத்து, திருஷ்டி கழித்தனர். பேச்சுவார்த்தையில் இழுபறி நீடிப்பதாக வந்த தகவலால், சில தொண்டர்கள் ஆத்திரமடைந்து, தினகரனுக்கு எதிராக கோஷம் எழுப்பினர். 'சசிகலா குடும்பத்தை, கட்சியில் இருந்து, முழுமையாக நீக்க வேண்டும்' என வலியுறுத்தினர். கட்சியினர் கூட்டம் அதிகம் இருந்ததால், அ.தி.மு.க., அலுவலக பகுதியில், சுண்டல், பட்டாணி, வேர்க்கடலை விற்பனை, அமோகமாக நடந்தது. அலுவலகம் உள்ளே உள்ள கடையில், டீ, குடிநீர், குளிர்பானங்கள் அனைத்தும் விற்று தீர்ந்தன. கட்சி அலுவலகம் எதிரே, அ.தி.மு.க., கொடி, ஜெ., படம் விற்பனை அமோகமாக இருந்தது.

மதியத்திற்கு மேல், பன்னீர்செல்வம் கட்சி அலுவலகம் வந்தபோது, நிர்வாகிகளிடம் உற்சாகம் கரைபுரண்டோடியது. அனைவரும், அவரை வாழ்த்தி, உற்சாக குரல் எழுப்பினர்.

- நமது நிருபர் -