தண்ணீர் பிரச்னை குறித்து முதல்வர் இபிஎஸ் அதிகாரிகளுடன் ஆலோசனை நடத்தினார். பின்னர் அவர் நிருபர்களிடம் பேசுகையில் : பருவ நிலை பொய்த்ததால் குடிநீர் தட்டுப்பாடு ஏற்பட்டது. இதனை போக்கிட அரசு உரிய நடவடிக்கை எடுத்து வருகிறோம். சராசரி மழை மிக குறைந்ததால் நிலத்தடி நீர்மட்டம் குறைந்து விட்டது.

சென்னையை சமாளிக்கும் திட்டம்

ஏரியில் தண்ணீர் இல்லாத காரணதத்தினால் ஜோலார்பேட்டையில் இருந்து ரயில் மூலம் சென்னைக்கு தண்ணீர் கொண்டு வர திட்டமிட்டுள்ளோம். இதற்கென ரூ.65 கோடி ஒதுக்கி உள்ளோம். 10 மில்லியன் லிட்டர் தண்ணீர் கொண்டு வரப்படும். இது போல் வீராணம் ஏரியில் இருந்து தண்ணீர் கொண்டு வர நடவடிக்கை எடுத்தோம். சென்னை மாநகர் மக்களுக்கு குடிநீர் வழங்கி வருகிறோம். அதிகாரிகள் தண்ணீர் தட்டுப்பாடு உள்ள பகுதிகளுக்கு கூடுதல் லாரி மூலம் தண்ணீர் வழங்க ஆலோசனை வழங்கி உள்ளோம்.

கேரளாவில் இருந்து தண்ணீர் கிடைத்தால் பிரச்னையை மேலும் சமாளிக்கலாம். கேரளா தண்ணீர் தருவதாக கூறி இருப்பதை வரவேற்கிறோம். நாள்தோறும் 20 லட்சம் லிட்டர் தண்ணீர் கொடுத்தால் நல்லது. தர முடியுமா என்று கேட்டு கடிதம் எழுத உள்ளோம். குடி நீர் பிரச்னையை சமாளிக்க உரிய நடவடிக்கை எடுக்குமாறு மாவட்ட கலெக்டர்களுக்கு அறிவுறுத்தி உள்ளோம். இவ்வாறு முதல்வர் கூறினார்.

கூடுதல் நிதி

இதனிடையே, தமிழகத்தில் குடிநீர் திட்டப்பணிகளுக்கு கூடுதலாக ரூ.200 கோடி ஒதுக்கி தமிழக அரசு உத்தரவு பிறப்பித்துள்ளது.

மாநகராட்சி, பேரூராட்சி, ஊரக பகுதிகளில் குடிநீர் பிரச்னைகளுக்கு தீர்வு காண நடவடிக்கை எடுக்கப்பட்டுள்ளதாகவும், ஜோலார்ப்பேட்டையில் இருந்து சென்னைக்கு, தினமும் 10 மில்லியன் லிட்டர் தண்ணீரை கொண்டு வர ரூ.65 கோடி நிதி ஒதுக்கப்பட்டுள்ளதாக, முதல்வர் இ.பி.எஸ்., வெளியிட்ட அறிக்கையில் கூறியுள்ளார்.

குடிநீர் தட்டுப்பாட்டை போக்குவதற்காக நடவடிக்கை எடுக்க தமிழக அரசு ஏற்கனவே ரூ.700 கோடி நிதி ஒதுக்கியுள்ளது.