அவரது அறிக்கை:

கடந்த 25ம் தேதி கோவை வந்த முதல்வர் ஸ்டாலின், காந்திபுரம், சிறைச்சாலை மைதான வளாகத்தில், 204 கோடி ரூபாயில் கட்டப்பட்டு வந்த செம்மொழி பூங்காவை, பணிகள் முடிவடையாமல், அவசர கதியில் விளம்பரத்திற்காக திறந்து வைத்துள்ளார். 70 சதவீத பணிகள் மட்டுமே முடிந்துள்ளதாக, கோவை மக்கள் புகார் தெரிவிக்கின்றனர்.

இதற்கு மாநில சுற்றுச்சூழல் தாக்க மதிப்பீட்டு ஆணையத்திடம் அனுமதி பெறப்படவில்லை; 30 சதவீத மரங்கள் நடப்படவில்லை. செயற்கை புல் தரைகள் மட்டுமே அமைக்கப்பட்டுள்ளன. முன் நுழைவு வாயில் முகப்பு, மாநாட்டு மையம், சுற்றுச்சுவர், கட்டண விளையாட்டு மைதானம், திறந்தவெளி உடற்பயிற்சிக் கூடம் போன்ற பணிகள் முடிக்கப்படவில்லை.

போதுமான கழிப்பிட வசதிகள் ஏற்படுத்தப்படவில்லை. விளையாட்டு உபகரணங்கள் அமைக்கப்படவில்லை. கிரானைட் கற்கள் பதிக்கும் பணிகள் முழுமை அடையவில்லை.

இப்பூங்காவில் பல பணிகள், 'டெண்டர்' கோரப்படாமல், 'நாமினேஷன்' முறையில், தி.மு.க., அரசுக்கு வேண்டிய ஒப்பந்ததாரர்களுக்கு வழங்கப்பட்டுள்ளதாக தெரிகிறது.

'ஸ்மார்ட் சிட்டி' திட்டத்தின் கீழ், அ.தி.மு.க., ஆட்சியில் உருவாக்கப்பட்ட உக்கடம்- பெரியகுளம், குறிச்சி குளம், வாலாங்குளம், முத்தண்ணன் குளம், செல்வசிந்தாமணி குளம், குமாரசாமி குளம், கிருஷ்ணாம்பதி குளம் ஆகிய பூங்காக்கள், தற்போது ஆகாயத் தாமரைகள் படர்ந்து பராமரிப்பின்றி உள்ளன.

அ.தி.மு.க., ஆட்சியில் கட்டப்பட்ட பூங்காக்கள், குளங்கள் என்ற ஒரே காரணத்திற்காக, இவைகளை மாநகராட்சி நிர்வாகம் பராமரிக்காமல் உள்ளது.

அ.தி.மு.க., ஆட்சியில் திட்டமிட்ட, கோவை மெட்ரோ ரயில் திட்டத்திற்கு, சரியான முறையில் முன்மொழிவு அனுப்பாத காரணத்தால், இத்திட்டம் மத்திய அரசால் திருப்பி அனுப்பப்பட்டது. கோவை விமான நிலைய விரிவாக்கமும் கிடப்பில் உள்ளது.

அ.தி.மு.க., அரசு கொண்டு வந்த பல திட்டங்களை, தி.மு.க., அரசு கைவிட்டு விட்டது.

இந்நிலையில், எடுத்தேன் கவிழ்த்தேன் என்று, அரசு சக்கரத்தை சுழற்றும் குணம் கொண்ட முதல்வர் ஸ்டாலின், அரைகுறையாக செம்மொழி பூங்காவை திறந்து வைத்து, கோவை மக்களை ஏமாற்றி, ஓட்டுகளை அறுவடை செய்யலாம் என்று, பகல் கனவு காண்கிறார்.

இவ்வாறு அதில் கூறப்பட்டுள்ளது.