பழையகாயல் கிராமத்தில் அனைத்து கிராம அண்ணா மறுமலர்ச்சி திட்டத்தில், 13 லட்சத்து 57,000 ரூபாய் மதிப்பில் கட்டப்பட்ட அங்கன்வாடி மையத்தைஅமைச்சர் அனிதா ராதாகிருஷ்ணன் திறந்து வைத்தார்.

அவர் நிகழ்ச்சியில் பங்கேற்க வந்தபோது, மறைந்த முன்னாள் முதல்வர்கள் எம்.ஜி.ஆர்.,- மற்றும் ஜெயலலிதா ஆகியோர் இணைந்து நடித்த அடிமைப்பெண் படத்தில் இடம்பெற்ற 'காலத்தை வென்றவன் நீ...' என்ற பாடல் ஒலித்தது.

கூட இருந்தவர்கள், இதை அமைச்சரிடம் சுட்டிக் காட்ட, பாட்டை நிறுத்தச் சொல்லுங்கள் என உத்தரவிட்டார் அமைச்சர். இதையடுத்து, பாடல் ஒலிபரப்பியோரை அணுகிய அமைச்சர் ஆதரவாளர்கள், 'பாட்டை நிறுத்துங்கள்' என கோபத்துடன் கூறினார். அதிர்ச்சியடைந்த கிராம மக்கள், பாட்டை நிறுத்தினர்.

கிராம மக்கள் கூறியதாவது:

அமைச்சர் அனிதா ராதாகிருஷ்ணன், ஏற்கனவே இப்படி நிகழ்ச்சிகளில் கலந்து கொண்ட போது, எம்.ஜி.ஆர்., பாடல்கள் ஒலிபரப்பட்டுள்ளன.

அவர் அ.தி.மு.க.,வில் இருந்ததோடு, எம்.ஜி.ஆர்., பாடல்கள் பிடிக்கும் என்பதால் பாடல் ஒலிபரப்பப்பட்டது.

ஆதரவாளர்கள் என்ன சொன்னார்கள் என தெரியவில்லை. பாடலை நிறுத்தச் சொன்னார்கள்; நிறுத்தி விட்டோம்.

இவ்வாறு அவர்கள் கூறினர்.