கோவை, கவுண்டம்பாளையம் வீட்டு வசதி வாரிய குடியிருப்பில் உள்ள, 13 வீடுகளில் கொள்ளை நடந்தது.

தனிப்படை கவுண்டம்பாளையம் போலீசார் வழக்கு பதிந்து விசாரித்தனர். இதில், 56 சவரன் நகைகள், 3 லட்சம் ரூபாய் ரொக்கம், 3 கிலோ வெள்ளி பொருட்கள் திருடப்பட்டதாக கூறப்பட்டது.

தனிப்படை போலீசார், அப்பகுதி கண்காணிப்பு கேமரா காட்சி களை ஆய்வு செய்ததில், இருவர் பையுடன் செல்வது தெரிந்தது.

விசாரணையில், கொள்ளையில் வட மாநிலத்தை சேர்ந்தவர்கள் ஈடுபட்டதும், அவர்கள், மதுக்கரை சுகுணாபுரம், குளத்துப்பாளையம் பகுதியில் பதுங்கி இருப்பதும் தெரிந்தது.

நேற்று அதிகாலை அங்கு சென்ற போலீசார், வீடு ஒன்றில் பதுங்கி இருந்த கொள்ளையர்களை பிடிக்க முயன்றனர். அவர்கள், அரிவாளால் தாக்கியதில் ஏட்டு பார்த்திபனுக்கு இடது கையில் காயம் ஏற்பட்டது.

மூவரையும், போலீசார் வலது காலில் சுட்டுப் பிடித்தனர். காயமடைந்த அவர்கள் கோவை அரசு மருத்துவமனையில் அனுமதிக்கப்பட்டனர்.

வட மாநிலத்தவர் கோவை மாநகர போலீஸ் கமிஷனர் சரவணசுந்தர் கூறியதாவது:

கொள்ளையர்களை பிடிக்க, கவுண்டம்பாளையம் இன்ஸ்பெக்டர் வெற்றிச்செல்வி, கார்த்திக் தலைமையில் தனிப்படை அமைக்கப்பட்டது. கொள்ளையர், உத்தர பிரதேசம், மஜீத்பூரா ஆப்பூரை சேர்ந்த இர்பான், 48, மொகாலுா, கஜ்ஜூவாலாவை சேர்ந்த கல்லு ஆரிப், 60, காசிப்பூரை சேர்ந்த ஆஷிக், 45 என, தெரிந்தது.

குனியமுத்துாரில் தங்கி, பாத்திர வியாபாரம் செய்யும் உ.பி.,யை சேர்ந்த, 12 பேருடன் தீபாவளிக்கு முன் வந்து தங்கினர்.

இரு தினங்களுக்கு முன், கவுண்டம்பாளையம் வந்து கொள்ளையில் ஈடுபட்டுள்ளனர். மூன்று மணி நேரத்தில் கொள்ளை சம்பவத்தை முடித்துள்ளனர். இவர்கள் ஏற்கனவே இதுபோன்ற கொள்ளைகளில் ஈடுபட்டவர்களா என்பதை அறிய, உ.பி., போலீசாருக்கு தகவல் அனுப்பப்பட்டுள்ளது.

இவ்வாறு, அவர் கூறினார்.