சுற்றுச்சூழலுக்கு பாதிப்பில்லாத சூரியசக்தி மின் பயன்பாட்டை ஊக்குவிக்கவும், வீடுகளில் மின் கட்டண செலவை குறைக்கவும், 'பி.எம்.சூர்ய கர் - முப்த் பிஜிலி யோஜனா' எனப்படும் சூரிய வீடு இலவச மின் திட்டத்தை, 2024 பிப்ரவரியில் மத்திய அரசு துவக்கியது.

ஒதுக்கீடு செய்யவில்லை

இத்திட்டத்தின் கீழ் நாடு முழுதும், 1 கோடி வீடுகளில் சூரியசக்தி மின் நிலையம் அமைக்க மானியம் வழங்கப்படுகிறது.

இதன்படி, ஒரு கிலோ வாட் திறனில் மேற்கூரை சூரியசக்தி மின் நிலையம் அமைக்க, 30,000 ரூபாய், 2 கிலோ வாட்டிற்கு, 60,000 ரூபாய் மானியம் வழங்கப்படுகிறது. அதற்கு மேல் கிலோ வாட்டிற்கு, 18,000 ரூபாய் மானியம் வழங்கப்படுகிறது.

பிரதமரின் திட்டத்தின் கீழ் தமிழகத்தில், 25 லட்சம் வீடுகளில், சூரியசக்தி மின் நிலையம் அமைக்க திட்டமிடப்பட்டது. அதில் கடந்த மாதம் வரை, 60,000 வீடுகளில் மட்டுமே சூரியசக்தி மின் நிலையங்கள் அமைக்கப்பட்டு உள்ளன.

இதுகுறித்து, மின் வாரிய அதிகாரி ஒருவர் கூறியதாவது:

பிரதமரின் திட்டத்தின் கீழ் சூரியசக்தி மின் நிலையம் அமைக்க, மாநில வாரியாக இவ்வளவு இணைப்புகள் என்று, ஒதுக்கீடு செய்யப்படவில்லை. மக்களின் விருப்பத்திற்கு ஏற்ப, அந்த மின் நிலையங்களை அமைக்க, மத்திய அரசு மானியம் வழங்குகிறது.

நாடு முழுதும் கடந்த ஜன., வரை பிரதமரின் திட்டத்தின் கீழ், 28 லட்சம் வீடுகளில் மேற்கூரை சூரியசக்தி மின் நிலையங்கள் அமைக்கப்பட்டுள்ளன. தமிழகத்தில் வீடுகளில் அதிகளவில் சூரியசக்தி மின்சாரம் பயன்படுத்தினால், மின் வாரியத்தின் சுமை குறையும். அதற்கு ஏற்ப, மின் தேவையை பூர்த்தி செய்ய, தனியாரிடம் இருந்து மின்சாரம் கொள்முதல் செய்வதை, மின் வாரியமும் குறைக்கும்.

ரூ70,000 செலவு

எனவே தான், பிரதமரின் திட்டத்தில், 25 லட்சம் வீடுகளில் சூரியசக்தி மின் நிலையம் அமைக்க திட்டமிடப்பட்டது. ஆனால், மக்களிடம் ஆர்வம் இல்லை. ஒரு கிலோ வாட் திறனில், மேற்கூரை சூரியசக்தி மின் நிலையம் அமைக்க சராசரியாக, 60,000 - 70,000 ரூபாய் செலவாகிறது.

இதில் மத்திய அரசு மானியம் வழங்குவது போல், தமிழக அரசும் குறிப்பிட்ட தொகையை மானியாக வழங்கினால், மின் நிலையம் அமைக்க மக்களிடம் ஆர்வம் ஏற்படும். இவ்வாறு அவர் கூறினார்.