சட்டசபையில் நேற்று பொதுப்பணி, நெடுஞ்சாலை துறை மானிய கோரிக்கைகள் மீதான விவாதத்திற்குப் பதிலளித்து, அமைச்சர் வேலு வெளியிட்ட அறிவிப்புகள்:

* 'உங்கள் தொகுதியில் முதல்வர்' திட்டத்தின் கீழ், புறவழிச்சாலைகள் அமைத்தல், சாலைகளை அகலப்படுத்தி மேம்படுத்துதல், ஆற்றுப்பாலங்கள், மழைநீர் வடிகால் கட்டுதல் போன்ற பணிகள், 250 கோடி ரூபாயில் மேற்கொள்ளப்படும்

* முதல்வர் சாலை மேம்பாட்டுத் திட்டத்தின் கீழ் நடப்பாண்டில், விருத்தாச்சலம் -- தொழுதுார் சாலை, கொடைரோடு -- வத்தலகுண்டு சாலை, சிவகாசி -- விருதுநகர் சாலை உள்ளிட்ட 220 கி.மீ., மாநில நெடுஞ்சாலைகள் நான்குவழிச் சாலைகளாகவும், 550 கி.மீ., சாலைகள் இருவழிச் சாலைகளாகவும், 2,200 கோடி ரூபாயில் அகலப்படுத்தி மேம்படுத்தப்படும்

* அனைத்து காலநிலைகளிலும், தங்கு தடையற்ற போக்குவரத்து திட்டத்தின் கீழ், 84 தரைப்பாலங்கள், 466 கோடி ரூபாயில் உயர்மட்ட பாலங்களாக கட்டப்படும்

* துாத்துக்குடி -- வாஞ்சி மணியாச்சி ரயில்வே சந்திப்பை இணைக்க, 200 கோடி ரூபாயில் புதிய இணைப்புச் சாலை அமைக்கப்படும்

* மதுரை பழங்காநத்தம், நாகர்கோவில் காவல்கிணறு, விருதுநகர் திருத்தங்கல், திண்டுக்கல் மாவட்டம் பழநி, திருவண்ணாமலை, திருப்பத்துார் மாவட்டம் ஆம்பூர், சென்னை அம்பத்துார், மறைமலை நகர், சிங்கப்பெருமாள் கோவில், மேல்மருவத்துார் ஆகிய இடங்களில், 787 கோடி ரூபாயில், 10 ரயில்வே மேம்பாலங்களும், சேலம் -- கொச்சி சாலையில் மரப்பாலத்தில் கீழ்பாலமும் அமைக்கப்படும்

* திண்டுக்கல் மாவட்ட அரசு மருத்துவமனை அருகே 18 கோடி ரூபாயில், நகரும் படிக்கட்டுகளுடன் நடை மேம்பாலம் அமைக்கப்படும்

* கிராம பொருளாதாரத்தை மேம்படுத்தும் வகையில், 1,000 கி.மீ., நீள ஊராட்சி ஒன்றிய சாலைகள், 1,000 கோடி ரூபாயில், இதர மாவட்ட சாலைகளாக தரம் உயர்த்தப்படும்

* விருதுநகர், ராஜபாளையம், கடலுார் புவனகிரி, திருவண்ணாமலை மாவட்டம் ஆரணி, நெல்லை களக்காடு, திருவள்ளூர் மாவட்டம் பள்ளிப்பட்டு, தஞ்சை நாச்சியார் கோவில் உள்ளிட்ட 15 புறவழிச்சாலைகள், இணைப்புச் சாலை, மேம்பாலம் அமைக்க 3 கோடி ரூபாயில், விரிவான திட்ட அறிக்கை தயாரிக்கப்படும்

* திருப்பூர் மாநகருக்கு புறவழிச்சாலை அமைக்கவும், துாத்துக்குடி நகரில் இணைப்புச் சாலை அமைக்கவும், 3 கோடி ரூபாயில் திட்ட அறிக்கை தயாரிக்கப்படும்.

இவ்வாறு அமைச்சர் அறிவித்தார்.