விழுப்புரத்தில் அவர் அளித்த பேட்டி:

தமிழகத்தில் 9 மாவட்டங்களை தவிர, பல மாவட்டங்களில், உள்ளாட்சி பதவிக்கான காலம் முடிந்துள்ளது. இதற்கான தேர்தலை எப்போது நடத்தப் போகின்றனர் என்பது குறித்து, தமிழக அரசு தெளிவான அறிவிப்பு வெளியிடவில்லை. சட்டசபை தேர்தல் நெருங்குவதால், யாரும் உள்ளாட்சி தேர்தல் பற்றி கவலைப்படவில்லை.

துாய்மை பணியாளர் இறந்தால், பணத்தை நிவாரணமாக அரசு வழங்குகிறது. அப்படியென்றால், உயிரின் விலை, பணம் மட்டும் தானா? அரசு, பொது நிறுவனங்களில் 50 பேர் துாய்மை பணியாளர்களாக பணியாற்றினாலே, அவர்களை பணி நிரந்தரம் செய்ய வேண்டும் என, ஆங்கிலேயர் காலத்து சட்டமே கூறுகிறது.

இதை திருத்தம் செய்து தான், தற்போது, துாய்மை பணியாளர்களை ஒப்பந்தப் பணியாளர்களாக்கி விட்டனர். எல்லோரும் அர்ச்சகர் ஆகலாம் என கூறுகின்றனர். ஆனால், எத்தனை தாழ்த்தப்பட்டவர் அர்ச்சகர் ஆகி உள்ளனர் என்பதை சொல்லவில்லை. இது தான் சமூக நீதியா?

துாய்மை பணியாளர்களை நிரந்தரம் ஆக்குவது, ஆணவ படுகொலைக்கு தனி சட்டம் கொண்டு வருவது, ஒடுக்கப்பட்ட மக்களுக்கான அரசியல் பொருளாதார வளர்ச்சிக்கு உதவுவது என எந்த விஷயத்தையும் தி.மு.க., அரசு செய்யவில்லை. அதனால், அக்கட்சி தவிர்த்து யாரோடும் கூட்டணி அமைப்போம்.

இவ்வாறு அவர் கூறினார்.