டில்லியில் இருந்து காணொலி வாயிலாக நேற்று அவர் அளித்த பேட்டி:

மத்திய பட்ஜெட்டில், ரயில்வேயில் பாதுகாப்பு கட்டமைப்புகளை மேம்படுத்த, 1.16 லட்சம் கோடி ரூபாய் ஒதுக்கீடு செய்யப்பட்டு உள்ளது. அடுத்த நான்கு முதல் ஐந்து ஆண்டுகளில், பழைய ரயில் பாதைகள் அனைத்தும் மாற்றப்படும்.

அடுத்த இரண்டு ஆண்டுகளில், 50 'நமோ பாரத்' ரயில்களும், 100 'அம்ரித் பாரத்' ரயில்களும், 200 'வந்தே பாரத்' ரயில்களும் இயக்க, பட்ஜெட்டில் ஒப்புதல் அளிக்கப்பட்டுள்ளது. 1,000 பாலங்கள் புதுப்பிக்கப்பட உள்ளன. 200 கி.மீ., துாரத்திற்குள் உள்ள முக்கிய நகரங்களுக்கு இடையே, 'நமோ பாரத்' ரயில்கள் இயக்கப்பட உள்ளன.

தமிழகத்தில் நடக்கும் ரயில்வே திட்டங்களுக்கு, மத்திய பட்ஜெட்டில், 6,626 கோடி ரூபாய் ஒதுக்கீடு செய்யப்பட்டுள்ளது. கடந்த 2009 - 14ம் ஆண்டுகளில், 879 கோடி ரூபாய் மட்டுமே ஒதுக்கப்பட்டது. இது, 7.5 மடங்கு அதிகம்.

இதற்கு முந்தைய பட்ஜெட்டில், தமிழகத்துக்கு, 6,362 கோடி ரூபாய் ஒதுக்கீடு செய்யப்பட்டது. 2014 முதல் இதுவரை, 2,242 கி.மீ., துார ரயில் பாதைகள் மின்மயமாக்கப்பட்டு உள்ளன. மேலும், 22 ரயில் பாதை திட்டங்கள், 33,467 கோடி ரூபாயில் நடந்து வருகின்றன.

இதுதவிர, சென்னை எழும்பூர், மதுரை, ராமேஸ்வரம் உள்ளிட்ட ஐந்து ரயில் நிலையங்களில், 1,896 கோடி ரூபாய் செலவில், சர்வதேச தரத்தில் மேம்பாட்டுப் பணிகள் நடந்து வருகின்றன.

அம்ரித் பாரத் திட்டத்தின் கீழ், 77 ரயில் நிலையங்கள், 2,948 கோடி ரூபாய் மதிப்பில் மேம்படுத்தப்பட்டு வருகின்றன.

தமிழகத்தில் தற்போது, எட்டு, 'வந்தே பாரத்' ரயில்கள் இயக்கப்படுகின்றன. தமிழகத்தில் நடக்கும் திட்டங்களுக்கு, 3,389 ஹெக்டேர் நிலம் தேவை. இதுவரை, 25 சதவீதம் நிலம் மட்டுமே கையகப்படுத்தப்பட்டு உள்ளது.

எனவே, ரயில் பாதை திட்டங்களை விரைந்து முடிக்க, மாநில அரசின் ஆதரவு தேவை. தனுஷ்கோடி -- ராமேஸ்வரம் ரயில் பாதை திட்டத்தை, தமிழக அரசு வேண்டாம் என்று தெரிவித்துள்ளது. மத்திய அரசு அதை கைவிடவில்லை.

கடந்த ஆண்டில், 1,200 முன்பதிவு இல்லாத பெட்டிகள் தயாரித்து, ரயில்களில் இணைத்து இயக்கப்படுகின்றன. அடுத்த சில ஆண்டுகளில், 14,000 முன்பதிவு இல்லாத பெட்டிகளை தயாரித்து, படிப்படியாக இணைக்க உள்ளோம்.

இவ்வாறு அவர் கூறினார்.