சித்தா, ஆயுர்வேத பாடத்திட்டத்திலிருந்து, அலோபதி பாடங்களை நீக்கியும், இந்திய மருத்துவ முறை பட்டப்படிப்புகளுக்கான பெயரில் மாற்றம் செய்தும், தமிழ்நாடு டாக்டர் எம்.ஜி.ஆர்., மருத்துவ பல்கலைக் கழகம் முடிவு செய்து, அதற்கான தீர்மானத்தையும் நிறைவேற்றியது.

இதை எதிர்த்து, சித்தா, ஆயுர்வேதம், யுனானி மருத்துவக் கல்லூரி மாணவர்கள், தமிழகம் முழுவதும் போராட்டம் நடத்தினர்.

இந்த விவகாரம், முதல்வரின் கவனத்துக்கு சென்றதையடுத்து, சம்பந்தப்பட்டவர்களை அழைத்து பேசி, பிரச்னைக்கு தீர்வு காணுமாறு சுகாதாரத் துறை அமைச்சருக்கு முதல்வர் உத்தரவிட்டதாக தெரிகிறது. இதைத் தொடர்ந்து, கோட்டையில் ஆலோசனை கூட்டம் நடந்தது. இதில், சுகாதார செயலர் கிரிஜா வைத்தியநாதன், எம்.ஜி.ஆர்., மருத்துவ பல்கலைக் கழக துணைவேந்தர் மயில்வாகனன், இந்திய மருத்துவ முறை ஆணையர் முகமது அஸ்லாம் மற்றும் சித்த, யுனானி மருத்துவ மாணவர்கள் பங்கேற்றனர்.

பாடத்திட்டத்தில் மாற்றம் கூடாது என, மாணவர்கள் வாதிட்டனர். பாடத்திட்டத்தில் மாற்றம் செய்யும் அதிகாரம் இந்திய மருத்துவ மத்திய கவுன்சிலுக்கு தான் உள்ளது. இப்போதுள்ள பாடத்திட்டத்தை மாற்றக் கூடாது என, பல்கலைக்கழகத்தை மத்திய கவுன்சில் எச்சரித்துள்ளது என்பதையும் மாணவர்கள் எடுத்துக் கூறினர். மாணவர்கள் தரப்பில் உள்ள நியாயத்தை இந்திய மருத்துவ முறை ஆணையர் எடுத்துக் கூறியதாக தெரிகிறது. இதையேற்று, மருத்துவ பல்கலைக்கழக துணைவேந்தர் மயில்வாகனன், பழைய பாடத்திட்டமே நீடிக்கும் என கூறியதாக மாணவர் தரப்பில் தெரிவித்தனர்.