இதன் காரணமாகவே, வெள்ளி விலை எப்போதும் இல்லாத வகையில், புதிய உச்சத்தை எட்டி வருகிறது.

வெள்ளி உற்பத்தியில் தொழிற்சாலைகளின் பங்கு சராசரியாக, 75 - 80 சதவீதமாகவும்; மீதி, பொது மக்கள் பயன்பாட்டிற்கும் இருந்தது. மத்திய அரசின் அறிவுறுத்தலை ஏற்று, நம் நாட்டில் பலரும் சுற்றுச்சூழலை பாதிக்காத மின் வாகனங்களை பயன்படுத்த துவங்கி உள்ளனர்.

இந்த வாகனங்கள் மட்டுமின்றி, சூரியசக்தி மின் சாதனம், விமானம் மற்றும் ராக்கெட், செயற்கைக்கோள், அனைத்து வகை எலக்ட்ரானிக்ஸ் சாதனங்கள் ஆகியவற்றில் வெள்ளி பயன்பாடு மிகவும் அதிகரித்துள்ளது.

இதன் காரணமாகவே, வெள்ளி விலை எப்போதும் இல்லாத வகையில், தொடர்ந்து புதிய உச்சத்தை எட்டி வருகிறது. அதன்படி, இந்தாண்டு ஜன., 1ல், 98 ரூபாய்க்கு விற்கப்பட்ட கிராம் வெள்ளி தற்போது, 52 ரூபாய் உயர்ந்து, 150 ரூபாயாக அதிகரித்துள்ளது.

இதுகுறித்து, சென்னை தங்கம் மற்றும் வைர நகை வியாபாரிகள் சங்க தலைவர் ஜெயந்திலால் சலானி கூறியதாவது:

மின் வாகனம் உள்ளிட்ட வளர்ந்து வரும் துறைகளில், வெள்ளி பயன்பாடு மிகவும் அதிகம் உள்ளது. இதனால் தற்போது, தொழிற்சாலைகளுக்கான வெள்ளி பயன்பாடு, 85 சதவீதமாக உயர்ந்துள்ளது. இதன் காரணமாகவே, வெள்ளி விலை அதிகரித்துள்ளது.

இவ்வாறு அவர் கூறினார்.

தொழில் துறையினர் கூறுகையில், 'சமீப காலமாக மின் வாகனங்களில் தான் வெள்ளி மிக அதிகளவில் பயன்படுத்தப்படுகிறது. இதற்கு, அதிவேக மின் கடத்தியாக வெள்ளி இருப்பதே முக்கிய காரணம்' என்றனர்.