கர்நாடகா தலைநகர் பெங்களூருக்கு அருகில், தமிழகத்தின் ஓசூர் நகரம் அமைந்திருப்பதால், தினமும் லட்சக்கணக்கான மக்கள், இரு நகரங்களுக்கும் பயணிக்கின்றனர். தொழில் நகரமான ஓசூரையும், பெங்களூரையும் இணைக்கும் வகையில், மெட்ரோ ரயில் திட்டத்தை செயல் படுத்த, தமிழக அரசு முயற்சி மேற்கொண்டது.

இதற்கான சாத்தியக்கூறு அறிக்கையை சென்னை மெட்ரோ ரயில் நிறுவனம் தயாரித்தது; இது, கர்நாடகா மாநில அரசுக்கு அனுப்பி வைக்கப்பட்டது.

இருப்பினும், அடுத்தகட்ட பணிகள் இன்னும் துவங்கவில்லை.

இதற்கிடையே, இந்த மெட்ரோ ரயில் திட்டத்தை செயல்படுத்த, பெங்களூரு மெட்ரோ ரயில் நிறுவனம் ஆர்வம் காட்டவில்லை. 'தொழில்நுட்ப ரீதியாக சாத்தியமில்லை' என, அது அறிவித்துள்ளது.

கல்வி, தொழில் போன்ற பணிகள் காரணமாக, ஓசூரில் இருந்து பெங்களூரு செல்லும் தமிழக மக்களின் எண்ணிக்கை நாளுக்கு நாள் அதிகரித்து வருகிறது.

இதற்கிடையே, ஓசூரில் புதிய விமான நிலையம் அமைய உள்ளதால், தொழில் வளர்ச்சி ஏற்படுவதோடு, ஐ.டி., நிறுவனங்கள் அதிகளவில் வரவும் வாய்ப்புள்ளது. இதனால், இந்த மெட்ரோ ரயில் திட்டம், கர்நாடகாவை விட, தமிழகத்துக்கு முக்கியமானதாக கருதப்படுகிறது.

இதுகுறித்து, சென்னை மெட்ரோ ரயில் நிறுவன அதிகாரிகள் கூறியதாவது:

கர்நாடகா மாநிலம் பொம்மசந்திராவில் இருந்து அத்திபள்ளி வழியாக, ஓசூருக்கு, 22 கி.மீ., நீளத்திற்கு மெட்ரோ ரயில் திட்டம் அமைப்பதற்கான சாத்தியக்கூறு அறிக்கை, அம்மாநில அரசிடம் கடந்த ஜூலையில் ஒப்படைக்கப்பட்டது.

தமிழகத்தில், 11 கி.மீ., மற்றும் கர்நாடகாவில், 12 கி.மீ., என, இரு மாநிலங்களை இணைக்கும் வகையில் இந்த மெட்ரோ ரயில் திட்டம் இருக்கும். இந்த திட்டத்தின் மதிப்பு, 5,400 கோடி ரூபாய். இந்த திட்டம், தமிழகத்துக்கு மிகவும் முக்கியமானது.

எனவே, மத்திய வீட்டு வசதி மற்றும் நகர்ப்புற விவகாரங்கள் அமைச்சகத்திடம், தமிழக அரசு வாயிலாக தொடர்ந்து வலியுறுத்துவோம். இந்த திட்டம் செயல்படுத்தப்பட்டால், ஓசூர் மற்றும் பெங்களூரு இடையேயான போக்கு வரத்து மேம்படும்.

இவ்வாறு அவர்கள் கூறினர்.