தமிழகத்தில் வீடு, தொழிற்சாலை உட்பட அனைத்து பிரிவுகளுக்கும் மின் வினியோகம் செய்யும் பணியை, அரசு நிறுவனமான மின் வாரியம் மட்டுமே மேற்கொள்கிறது. மாநிலம் முழுதும் ஒரு நாள் அதாவது, 24 மணி நேரமும் பயன்படுத்தப்படும் மின்சாரத்தின் அளவு மின் நுகர்வு எனப்படுகிறது.

தினமும் சராசரியாக, 30 கோடி யூனிட்களாக உள்ள மின் நுகர்வு, கோடை வெயிலால் இந்தாண்டு ஏப்ரல், 30ல், 45.43 கோடி யூனிட்களாக அதிகரித்தது. இதுவே, இதுவரை உச்ச அளவாக உள்ளது.

சமீப காலமாக, சுற்றுச்சூழல் மாசு அடைவதை தடுக்கவும், பெட்ரோல் மற்றும் டீசலால் ஏற்படும் செலவை குறைக்கவும் பலரும், இ.வி., எனப்படும் மின்சாரத்தில் ஓடும் பைக், கார்களை வாங்கி வருகின்றனர். இந்தாண்டு தமிழகம் உட்பட நாடு முழுதும் லோக்சபா தேர்தல் நடந்தது. தமிழகத்தில் ஏப்ரல், 19ல் தேர்தல் நடந்ததால், மார்ச்சில் தேர்தல் பிரசாரம் நடந்தது.

அம்மாதம் வெயில் கடுமையாக சுட்டெரித்தால் வீடு, அலுவலகங்களில், 'ஏசி' சாதனங்களின் பயன்பாடு வழக்கத்தை விட மிகவும் அதிகம் இருந்தது. இதுபோன்ற காரணங்களால், கடந்த மார்ச்சுடன் முடிவடைந்த, 2023 - 24ம் நிதியாண்டில், தமிழக மின் நுகர்வு, 11,096 கோடி யூனிட்களாக அதிகரித்துள்ளது. இதுவே, 2022 - 23ல், 10,354 கோடி யூனிட்டாக இருந்தது. கடந்த ஆண்டில் மட்டும் கூடுதலாக, 742 கோடி யூனிட்கள் உயர்ந்துள்ளது.

எந்தெந்த பிரிவில் எவ்வளவு மின்சாரம்?

பிரிவு / 2022 - 23 / 2023 - 24 கோடி யூனிட்களில்

---------------------------------------------

வீடு, வீடுகளில் உள்ள கைத்தறி - 3,060 - 3,226

குடிசை வீடுகள் - 45 - 41

தெரு விளக்கு, குடிநீர் வினயோகம் - 250 - 260

குறுந்தொழில்கள் - 31 - 33

விசைத்தறி - 97 - 96

சிறிய தொழிற்சாலை - 812 - 819

விவசாயம் - 1,417 - 1,583

உயரழுத்த தொழிற்சாலை - 3,012 - 3,242

மின்சார வாகனம் - 0 - 35 லட்சம்

* மின் வாகனங்களுக்கு பலர் வீடுகளிலேயே சார்ஜ் செய்கின்றனர். இது தவிர, பொதுத்துறை நிறுவனங்கள் பொது சார்ஜிங் மையம் அமைத்து வருன்றன.

கடந்த, 2023 - 24ல் தமிழகம் முழுதும், 193 சார்ஜிங் மையங்கள் செயல்பட்ட நிலையில், 35 லட்சம் யூனிட் மின்சாரம் பயன்படுத்தப்பட்டு உள்ளது. அதற்கு முந்தைய ஆண்டில், 4 மையங்கள் இருந்தபோதிலும், யாரும் பயன்படுத்தவில்லை.